Знаете ли дека почетоците на Скопската зоолошка градина датираат од пред сто години? Во 1926 година биологот, визионер и научник Станко Караман ги поставува основите на денешната Зоолошка градина во рамки на Градскиот парк. Неговата визија била за живо училиште на отворено каде децата и возрасните учат да ја разбираат и почитуваат природата.

„Тоа било за тоа време значи многу современо, модерно. Бидејќи во 1926 година ретко каде имало зоолошки градини во светот, но и градски паркови каде што исто биле направени со доста автохтони растенија, но и со растенија коишто ги донел Станко Караман” изјави за ТРТ Балкан Тина Мицковска задолжена за односи со јавност во Зоолошка градина Скопје.

Таа смета дека во иднина зоолошката градина може да прерасне и во голем едукативен центар.

„Овде се смениле многу директори се смениле многу вработени. Имало навистина многу случувања во зоолошката. Преживеала и подеми и падови. Овде имало земјотрес како што памтиме 1963, имало поплави, но ете се уште се држи цврсто. И се ндевам дека во наредните години ќе успееме да ја направиме уште подобра бидејќи оваа зоолошка заслужува да биде еден голем едукативен центар, според визијата на Станко Караман” вели Мицковска.

Во зоолошката градина во Скопје живеат 500 животни од речиси 90 видови. Се обновуваат старите и се градат нови живеалишта, потврдува директорката на зоолошката градина Катерина Костова.

„Правиме дезинфекција и дератизација првично на сите живеалишта во градината значи на цела површина од 13 хектари. Менување на постоечката стара земја и поставување на нова соодветна. Втор план имаме да направиме реконструкција на старите живеалишта на тие што се најмногу дотрајани. Бидејќи нели 100 години зоолошка, имаме живеалишта што се и по 50 години. Во план е да ја зголемиме збирката на видови животни што ги имаме во градината. Да донесеме нoви животни, капитални животни и животни што во овие сто години ги немала градината”, изјави Костова за ТРТ Балкан.

Денес Зоолошката градина во Скопје има едукативна мисија. Освен домашни, присутни се посетители и од земјите од регионот.