Две лица загинале во нападите извршени од руските сили ноќта помеѓу 4 и 5 јануари врз Киев и Киевската област, при што е предизвикана и материјална штета, а погодена е и приватна болница, соопштија денес украинските власти.

Исто така, издадена е тревога за воздушен напад за целата земја.

Градоначалникот на Киев, Виталиј Кличко, изјави дека од 26-те пациенти на приватната клиника што беше погодена во нападот, 16 се префрлени во градските болници, а од тројцата повредени лица, двајца се хоспитализирани во тешка состојба, пренесува „Униан“.

Според украинската национална полиција, починал маж роден во 1995 година, кој бил на болничко лекување.

Меѓу повредените се 42-годишна жена, која била лекувана на лице место, како и две жени на возраст од 77 и 97 години, кои биле лекувани во болницата.

Украинската државна служба за вонредни ситуации објави дека четирикатна болничка зграда со активно болничко одделение била директно погодена во округот Оболонски.

„Пожарот е изгаснат, а за време на прегледот на просториите е пронајдено телото на едно лице“, се наведува во соопштението.

Во исто време, во текот на ноќта, беше нападнат и Киевскиот регион.

Шефот на Киевската регионална воена администрација, Микола Калашник, објави дека во нападот е убиен цивил, маж роден во 1951 година, чие тело е пронајдено при гаснење на пожарот во неговата куќа.

Поради нападот, градот Славутич останал без електрична енергија.