Владите на Соединетите Американски Држави и Кина денес потпишаа договор со кој контролата врз американската филијала на ТикТок ќе се пренесе на група инвеститори предводени од технолошките гиганти Оракл и инвестициската фирма Силвер Лејк, изјави за Политико функционер на Белата куќа и лице запознаено со договорот.

Според договорот, кој беше наведен во интерен меморандум минатиот месец од извршниот директор на ТикТок, Шо Чу, социјалната мрежа ќе биде управувана во САД од заедничко вложување во кое учествуваат Оракл и Силвер Лејк.

Одлуката следува по донесување на законот од 2024 година, кој бара од матичната компанија на ТикТок, кинеската БаајтДенс, да ја продаде апликацијата за да ги реши обвинувањата за наводни врски со Кинеската комунистичка партија.

Чу претходно изјави во декември дека БајтДенс потпишала обврзувачки договор со инвеститорите, во исчекување на регулаторно одобрување.

Администрацијата на американскиот претседател Доналд Трамп потоа сигнализираше поддршка за договорот со привремено суспендирање на законот, кој би ја забранил апликацијата доколку не се продаде.

Според условите од декемврискиот договор, меѓу сопствениците на американските субјекти би биле компанијата за приватен капитал„Силвер Лејк, фирмата за вештачка интелигенција МГКС од Абу Даби и Оракл.

Крајниот рок за финализирање на договорот, кој администрацијата на Трамп постојано го продолжуваше, истекува на 23 јануари.