Европската унија сака да ја зајакне палестинската управа за да може да биде рамноправен соговорник на Израел, изјави во понеделникот во Луксембург комесарката за Медитеранот Дубравка Шуица.

Пред почетокот на првиот дијалог на високо ниво меѓу ЕУ и палестинската управа, таа рече дека во таа власт не може да има место за Хамас.

„Ние првенствено бараме добро владеење, сакаме да знаеме како палестинските власти ќе управуваат не само со Западниот Брег, туку и со Газа“, рече Шуица.

Таа рече дека палестинската управа треба да се зајакне и реформира пред да се распишат изборите.

Во понеделникот, по повод првиот дијалог ЕУ-Палестинската управа, Европската комисија предложи сеопфатна програма за поддршка за периодот 2025-2027 година во вредност до 1,6 милијарди евра за поттикнување на палестинскот закрепнување и отпорност.

Од овие 1,6 милијарди евра, 620 милиони евра ќе бидат грантови како директна помош за буџетот на палестинската управа.

Средствата се наменети за решавање на најитните потреби на јавната администрација.

Околу 576 милиони евра грантови се наменети за поддршка на конкретни проекти на терен за зајакнување на економското закрепнување на Западниот Брег, Источен Ерусалим и Газа, како што дозволува ситуацијата на теренот.

До 400 милиони евра се наменети за заеми од Европската инвестициска банка за палестинскиот приватен сектор.

Повеќето плаќања од ЕУ ќе бидат условени од напредокот на владата во клучните реформи во областите на фискалната одржливост, демократското владеење, развојот на приватниот сектор и јавната инфраструктура и услуги.

ЕУ ќе ја исплати својата директна финансиска помош преку механизмот на ЕУ ПЕГАСЕ за да се осигура дека се воспоставени потребните контроли и заштитни мерки во однос на крајните приматели на поддршката од ЕУ.

Комисијата најави дека ќе лансира посветена палестинска донаторска платформа, која ќе биде форум за палестинската управа да го претстави спроведувањето на својата програма за реформи и да обезбеди целосна транспарентност во спроведувањето на програмата.

ЕУ и Палестинската управа потпишаа писмо за намери на 19 јули 2024 година, во кое се утврдува стратегија за справување со критичната буџетска и фискална ситуација на палестинската управа и палестинската економија.

Од јули 2024 година до февруари оваа година на палестинската управа и биле исплатени 400 милиони евра.

ЕУ е најголемиот обезбедувач на надворешна помош за Палестинците со билатерални распределби од приближно 1,36 милијарди евра за периодот 2021-2024 година, од кои веќе се доделени повеќе од 1,043 милијарди евра.