Меѓународните превозници во Црна Гора денеска започнаа со блокирање на товарниот сообраќај на граничните премини, кое најавија дека ќе трае до 17 април.

Протестот беше организиран поради строгите правила на Европската унија за професионалните возачи, но и поради, како што наведоа превозниците, неисполнетите ветувања на Владата на Црна Гора, вклучително и враќањето на акцизите на горивата и намалувањето на задржувањето на границите, пренесува РТЦГ.

Протестот беше одобрен од полицијата на сите гранични премини, освен во пристаништето Бар, а претставникот на Здружението, Ѓорѓе Љешњак, вели дека биле принудени да протестираат по четврти пат за да ги решат долгогодишните проблеми кои ескалираа на нивна штета во последната година и по низа одлуки, и буквално ги доведоа до работ на затворање.

Тој исто така истакна дека бараат државата повеќе да влијае на европските правила, иако засега, вели, немаат проблеми во тој дел, иако некои возачи ги прекршиле роковите за задржување во други држави.

Додаде дека претходно разговарале со министерот за економски развој, Нико Ѓељошај, и дека биле уверени дека барањата што се оправдани ќе бидат решени, но дека ништо не е преземено и дека ситуацијата е полоша отколку што беше.

Додаде дека тоа нема да го попречува патничкиот сообраќај.

„Ќе бидеме паркирани од страна, но ќе биде спречено поминување на камиони, освен оние што транспортираат експлозиви од прва класа, живи животни, дипломатски пратки и лекови“, рече Љешњак.

Црногорските превозници заедно со колегите од БиХ, Северна Македонија и Србија во јануари седум дена ги блокираа граничните премини поради примената на регулативата што пропишува престој во ЕУ од 90 дена во период од 180 дена.