„Хјуман рајтс воч“ (ХРВ) денес ги повика владите да преземат итни мерки за заштита на правата на палестинскиот народ во Газа, без да чекаат спроведување на планот за прекин на огнот.
Организацијата за човекови права со седиште во Њујорк соопшти дека планот што го презентираше американскиот претседател Доналд Трамп за постигнување прекин на огнот во Појасот Газа „не ги заменува итните мерки што владите мора да ги преземат за да ги заштитат цивилите и да ја поддржат правдата по две години тешки злоупотреби во Израел и Палестина“.
„Планот од 20 точки не се однесува директно на прашањата поврзани со човековите права или одговорноста за сериозните злосторства извршени од 7 октомври 2023 година“, се вели во соопштението.
Организацијата документираше голем број прекршувања на законите на војување што претставуваат воени злосторства и злосторства против човештвото, вклучително истребување (на Палестинците), акти на геноцид и прекршувања на обврзувачките наредби издадени од Меѓународниот суд на правдата (МСП), додаде таа.
Организацијата ги повика владите да извршат притисок врз Израел да ги укине незаконските ограничувања за влез на хуманитарната помош во Појасот Газа и да воведат санкции за Тел Авив, вклучително и запирање на трансферот на оружје, суспендирање на трговските договори со Израел и издавање забрани за патување и замрзнување на средствата на израелските функционери што се вмешани во тековните тешки прекршувања.
„Сите влади мора да дејствуваат за да спречат натамошни злосторства и да ја одбранат универзалноста на човековите права“, соопшти групата.
На 29 септември Трамп претстави план од 20 точки, кој вклучува ослободување на сите израелски заробеници во замена за палестинските затвореници, прекин на огнот, разоружување на палестинската група Хамас и обнова на Газа.
Во неделата делегација на Хамас пристигна во Египет на индиректни преговори со Израел откако изјави дека во принцип се согласила со планот.
Во израелските бомбардирања од 7 октомври 2023 година досега се убиени повеќе од 67.100 Палестинци во Газа, повеќето жени и деца.
Нападите ја направија енклавата несоодветна за живот, а тековната блокада дополнително предизвика глад кај населението.
