Премиерот на Молдавија Александар Мунтеан поднесе оставка, со што започна процесот на оставка на целата влада во услови на растечки политички последици околу скандалот со државната компанија за воздушна навигација „МолдаТСА“.

Мунтеану, кој ја извршува функцијата премиер од ноември 2025 година, не ја објасни својата одлука детално.

Во објава на социјалната мрежа X, тој изјави дека неговиот мандат завршува и дека одлучил да се пензионира кога заклучил дека повеќе не може да ги извршува своите должности во согласност со своите принципи и верувања.

„Го прифатив предлогот да бидам премиер со голема одговорност и со цврсто верување дека можам да придонесам за промена на работите на подобро. Денес завршува мојот мандат како премиер. Во моментот кога сфатив дека повеќе не можам да го извршувам мојот мандат во согласност со моите принципи и верувања, решив да се повлечам“, напиша тој.

Според уставната процедура, претседателката на Молдавија, Маја Санду, ќе се консултира со парламентарните партии, по што ќе предложи нов мандатар за состав на владата.

Мунтеану (62), беше назначен за премиер по парламентарните избори одржани во септември 2025 година, на кои Партијата за акција и солидарност (ПАС), oснована од Санду, извојува убедлива победа над проруските политички ривали и обезбеди продолжување на проевропскиот курс на земјата.

ПАС има апсолутно мнозинство во Парламентот со 101 место.

Пред да влезе во молдавската политика, тој работеше во странство повеќе од 20 години, вклучително и во Светската банка.

Во својата објава, тој рече дека ќе продолжи да ѝ служи на Молдавија без оглед на позицијата што ја има во иднина.

Неговото заминување доаѓа неколку дена откако контроверзноста околу „МолдаТСА“ предизвика политичка криза, што ја натера претседателката Маја Санду да вети „сеопфатно расчистување“ по обвинувањата за назначувања и начинот на управување во државното претпријатие.

Вчера Парламентот на Молдавија формираше посебна истражна комисија за да го испита управувањето со државните компании. Таа ќе ги разгледа процедурите за поставување на позиции на вишо раководство, составот на одборите на директори и случаите во кои поединци истовремено имаат позиции во повеќе јавни институции.

Молдавија, која граничи со Украина и Романија, е кандидат за членство во Европската Унија.

Политичката сцена на таа земја е поделена со години помеѓу проевропските сили и партиите кои се залагаат за поблиски односи со Русија, потсетува Ројтерс.