Туркије ги обнови разурнатите подрачја „во рекордно краток рок од три години“, порача Реџеп Таип Ердоган, истакнувајќи дека жртвите нема да бидат заборавени.

Претседателот на Туркије во петокот им оддаде почит на настраданите во земјотресите што на 6 февруари 2023 година го погодија југот на Туркије, по повод третата годишнина од катастрофата, порачувајќи дека владата го исполнила ветувањето за обнова на разурнатите градови во краток рок.

Реџеп Таип Ердоган го одбележа сеќавањето на жртвите од двата силни земјотреса што пред три години погодија 11 провинции, нагласувајќи ја трајната посветеност на државата кон зачувување на споменот на настраданите и обновата на погодените подрачја.

„Нема да ги заборавиме нашите браќа и сестри кои, поради двата големи земјотреса што ги доживеавме пред точно три години, се преселија кај Милостивиот“, порача Ердоган на турската социјална мрежа NSosyal.

„Му ветивме на нашиот народ дека нивниот спомен засекогаш ќе го носиме во срцата и мислите, ќе го чуваме она што ни го доверија и повторно ќе ги издигнеме нашите градови кои земјотресот ги разурна. Денес, со дозвола на Алах, го надминавме овој предизвик и ги обновивме и оживеавме нашите градови за само три години. Го одржавме зборот“, додаде тој.

Објавата на Ердоган вклучуваше и видео-снимка што ги прикажува размерите на разурнувањата предизвикани од земјотресите, како и напорите за обнова што потоа беа спроведени низ целиот погоден регион.

Земјотресите од 6 февруари 2023 година, со епицентар во јужната провинција Кахраманмараш, предизвикаа огромни разурнувања во повеќе провинции на југот на Туркије, при што десетици илјади луѓе го загубија животот, а инфраструктурата и станбените објекти претрпеа големи штети.

Претседателот подоцна во петокот треба да присуствува и на комеморативни церемонии во знак на сеќавање на жртвите од земјотресот.