Јапонија: Премиерката Такаичи постигна историска изборна победа

Коалицијата на јапонскaта премиерка Санае Такаичи оствари историска изборна победа во неделата, обезбедувајќи двотретинско мнозинство во Долниот дом на парламентот и отворајќи го патот за ветените намалувања на даноците и зголемување на воените трошоци насочени кон спротивставување на Кина.

Таа ги распиша изборите само четири месеци откако ја презеде функцијата лидер на партијата, а нејзината популарност очигледно преовлада.

Такаичи обезбеди 316 од 465 места во Долниот дом на парламентот за нејзината Либерално-демократска партија (ЛДП), што е најдобар резултат во историјата на партијата.

Со коалицискиот партнер, Јапонската иновативна партија, Такаичи контролира 352 места и двотретинско супермнозинство, што ѝ олеснува да го протурка законодавството бидејќи може да го надгласа Горниот дом, каде што нема мнозинство.

Новата центристичка Реформска алијанса, која ги обединува главната опозициска Уставна демократска партија (ЦДП) и поранешниот партнер на ЛДП, Комеито, би можела да изгуби повеќе од две третини од своите сегашни места.

„Овие избори вклучуваа големи промени во политиката - особено голема промена во економската и фискалната политика, како и зајакнување на безбедносната политика“, рече Такаичи во телевизиско интервју по објавувањето на резултатите.

„Ова се политики што предизвикаа многу противење... Ако сме добиле јавна поддршка, тогаш навистина треба да се справиме со овие прашања со полна сила“, додаде таа.

„Сегашниот кабинет работи добро и веќе дава резултати, па затоа немам намера да го менувам. Јас поддржувам намалување на данокот на потрошувачка и повикувам на формирање меѓупартиски форум за забрзување на дискусијата за ова важно прашање“, рече Такаичи.

Гласачите беа привлечени од нејзината директност и имиџ на вредна политичарка, но нејзините националистички призвуци и фокусот на безбедноста ги затегнаа односите со моќниот сосед Кина, додека нејзините ветувања за намалување на даноците ги потресоа финансиските пазари.

Инфлацијата останува голема грижа, при што зголемувањето на цените е сè уште над 2 проценти речиси три години.

Ветувањето на Такаичи од кампањата за пакет стимулации вреден повеќе од 110 милијарди евра и укинување на данокот на промет од 8 проценти на храна за да им помогне на домаќинствата да се справат со зголемувањето на цените ги вознемири инвеститорите, кои се загрижени како земјата со најголем долг меѓу развиените економии ќе го финансира планот.

Такаичи во неделата изјави дека ќе го забрза разгледувањето на намалувањето на данокот на промет, а воедно ќе се фокусира на фискалната одржливост.

„Нејзините планови за намалување на даноците на потрошувачка оставаат големи прашања за финансирањето и како таа ќе успее да сврзе крај со крај“, рече Крис Скиклуна, раководител на истражувањето во Даива Капитал Маркетс Јуроп во Лондон.

ЛДП, која управуваше со Јапонија во поголемиот дел од нејзината повоена историја, ја изгуби контролата врз двата дома на парламентот на изборите во текот на изминатите 15 месеци под претходникот на Такаичи, Шигеру Ишибаши.

Такаичи успеа да ја сврти среќата на партијата со тоа што ќе ги привлече помладите гласачи.

Таа дури и предизвика лудост наречена санакацу, што грубо се преведува како Санае-манија. Нејзината чанта и розовото пенкало што го користи за водење белешки во парламентот станаа многу барани.

Мандатот на Такаичи би можел да ги забрза нејзините планови за зајакнување на одбраната на Јапонија, дополнително разгневувајќи го Пекинг, кој ја обвинува дека се обидува да го оживее милитаристичкото минато.

Јапонскиот министер за одбрана Шинџиро Коизуми изјави за телевизиските станици во неделата вечерта дека сака да продолжи со политиките за зајакнување на одбраната на Јапонија, а воедно да одржува дијалог со Кина.

„Пекинг нема да ја поздрави победата на Такаичи“, рече Дејвид Болинг, виш советник во Азија Груп, фирма која советува компании за геополитички ризик.

„Кина сега се соочува со реалноста дека Такаичи цврсто си стои на своето место и дека нејзините обиди целосно да ја изолираат се целосно неуспешни“.