Украинскиот парламент во четврток гласаше за назначување на Јулија Свириденко за нов премиер на земјата.

Пратеникот Олексиј Гончаренко напиша на Телеграм дека претставниците на Врховната рада ја одобрија Свириденко за функцијата со 262 гласа „за“ од вкупно 450 пратеници.

Пред гласањето, Свириденко ја извршуваше функцијата прв вицепремиер и министер за економија од ноември 2021 година.

„Нашата влада го поставува својот курс за Украина која цврсто стои на сопствените темели, воени, економски и социјални. Мојата клучна цел се реални, позитивни резултати што секој Украинец ќе ги почувствува во секојдневниот живот“, рече таа на социјалната мрежа X.

Таа ги наведе сигурните залихи за украинската армија, проширувањето на домашното производство на оружје и зајакнувањето на технолошката сила на одбранбените сили на земјата како приоритети на нејзината влада за следните шест месеци.

Во понеделник, украинскиот претседател Володимир Зеленски објави дека ја номинирал Свириденко да ја води владата, сигнализирајќи почеток на голема реконструкција на кабинетот додека војната меѓу Русија и Украина беснее во својата четврта година.

Врховната рада вчера ја одобри оставката на поранешниот премиер Денис Шмихал и неговиот кабинет. Шмихал ја извршуваше функцијата пет години, што е најдолг мандат во историјата на земјата.

Тој треба да биде назначен за минситер за одбрана.

Свириденко, пак, стана втората жена што ја презеде функцијата украински премиер по Јулија Тимошенко, која кратко ја извршуваше функцијата во 2005 година, а подоцна од декември 2007 година до март 2010 година.