Седумнаесет лица загинаа, а 44 се повредени во ноќните напади врз Киев и околниот Киевски регион, изјави украинскиот претседател Владимир Зеленски.

Во нападот биле употребени 24 балистички ракети, четири ракети „Циркон“ и „Оникс“ и 115 дронови, од кои многу се на млазен погон, рече Зеленски во соопштението на Телеграм.

Магацини, инфраструктура и железничка станица беа меѓу целите, додаде тој.

Зеленски повика на зголемување на испораките на пресретнувачи на балистички ракети за Украина, повикувајќи ги Г7 и ЕУ да воведат дополнителни санкции врз руските производители на балистички ракети.

Во меѓувреме, Министерство за одбрана на Русија соопшти дека воздушната одбрана пресретнала и уништила 475 украински дронови над руските региони и Црното и Азовското Море во текот на ноќта.

Во Ростовскиот регион, според гувернерот Јуриј Сљусар, повеќе од 40 беспилотни летала биле уништени над областите Тарасовски, Каменски, Милеровски и Неклиновски.

Паѓачките остатоци предизвикаа пожар на сува трева во населбата Неклиновски, кој подоцна беше изгаснат, рече Сљусар.

Во регионот Тула, пожар избувна во центарот за сортирање „Вајлдберис“ откако падна дрон, изјави гувернерот Дмитриј Милјаев.

Две станбени згради и два индустриски објекти беа исто така оштетени. Според извештаите, едно лице е повредено.

Во Татарстан, паѓањето остатоци од беспилотни летала предизвика мал пожар во цивилен објект во округот Зеленодолск, според началникот на округот Михаил Афанасиев.

Пожарот бил брзо изгаснат, а нема информации за повредени.

Тврдењата од двете страни не можеа независно да бидат потврдени.