Мнозинството гласачи во западната канадска покраина Алберта гласаа за останување дел од државната федерација на референдумот кој има необврзувачки карактер.

Според пребројувањето на 1.480 од 5.587 избирачки места, првичните бројки покажаа дека 76,2% од гласачите, или 826.918 луѓе, се за останување во Канада, додека 23,8%, или 257.726 гласачи, го поддржаа започнувањето на процесот на одвојување.

На референдумот гласачите беа прашани: „Дали Алберта треба да остане покраина на Канада или Владата на Алберта треба да го започне правниот процес потребен според канадскиот Устав за одржување обврзувачки покраински референдум за тоа дали Алберта треба да се одвои од Канада?“

Околу 1,36 милиони жители гласале преку механизми за рано и специјално гласање, според покраинската изборна агенција „Избори Алберта“.

Гласачкото ливче содржеше 10 прашања, при што првите девет се однесуваа на имиграцијата и уставните прашања, а последното прашање се фокусираше на иднината на Алберта во рамките на Канада.

Референдумот не е обврзувачки и не одредува автоматски дали Алберта ќе ја напушти канадската федерација.

Изборната комисија на Алберта соопшти дека гласачките ливчиња ќе се пребројуваат рачно, а прво ќе се преброи прашањето за одвојување.

Агенцијата соопшти дека неофицијалните резултати се очекуваат во рок од 48 часа по затворањето на гласачките места, додека официјалните резултати се закажани за 29 октомври.