Претседателката на Европската комисија Урсула фон дер Лајен во понеделникот објави дека ќе предложи насочена измена на регулативата за стандардите за емисија на јаглерод диоксид за патнички и лесни комерцијални возила овој месец, со цел да се избегнат производителите да плаќаат високи казни во случај на неусогласеност.

Според регулативата донесена во март 2023 година за построги стандарди за емисија на ЦO2 за нови патнички автомобили и нови лесни комерцијални возила, од почетокот на годинава до 2029 година, сите производители мора да ги намалат просечните емисии за 15 отсто во однос на 2021 година, а потоа за 55 проценти за нови автомобили и 50 % за нови комбиња за период 2030-2034, и за 100 проценти од 1 јануари 2035 година.

Многу производители нема да ги исполнат овие цели оваа година и ќе се соочат со огромни казни кои би можеле да достигнат и до 15 милијарди евра.

Затоа, Комисијата ќе предложи малку пофлексибилни правила за да им се даде на производителите повеќе време да ги исполнат овие цели.

Новата промена ќе се состои од земање предвид на емисиите на јаглерод диоксид во текот на три години, од 2025 до 2027 година, наместо само една година. Ова ќе им даде повеќе време на производителите кои доцнат во усогласувањето, а во исто време ќе ги награди оние кои веќе го направиле тоа.

„Наместо годишна усогласеност, компаниите ќе добијат три години. Целите остануваат исти, секој мора да ги исполни целите. Ова значи повеќе простор за дишење за индустријата и повеќе јасност, без промена на договорените цели“, рече Фон дер Лајен по состанокот со претставниците на автомобилската индустрија од БМВ, Рено, Стелантис (Пежо и Цитроен) и Фолксваген.

Комисијата во среда ќе објави акционен план за автомобилската индустрија за да му помогне на овој клучен сектор да се електрифицира што е можно побрзо и успешно да се справи со кинеската конкуренција.