Астронаутите на мисијата Артемис II на НАСА се подготвија да влезат во „сферата на влијание“ на Месечината, што претставува клучна пресвртница во првото прелетување на човечки екипаж покрај Месечината по повеќе од 50 години.
Кога стигнаа до петтиот ден од 10-дневната мисија, вселенското летало Орион беше на околу 346.000 километри од Земјата и приближно 104.000 километри од Месечината, според НАСА. Орион веќе влезе во гравитационата сфера на влијание на Месечината, каде што лунарната гравитација станува посилна од Земјината.
Претходно, НАСА објави слика од Месечината направена од екипажот, а на која се гледа во далечина базенот Ориентале.
„Оваа мисија означува прв пат целиот базен да биде виден со човечки очи“, соопшти НАСА.
За време на прелетот, астронаутите ќе ја набљудуваат Месечината директно и ќе снимаат слики користејќи вградени камери.
Рекордна мисија
НАСА соопшти дека екипажот завршил демонстрации на рачно пилотирање и ги разгледал плановите за прелетот, вклучувајќи мапирање и фотографирање на клучните карактеристики на површината.
Во исто време, тимовите внимателно ги следат системите за одржување на животот во вселенското летало.
На петтиот ден, астронаутите ги тестирале и своите итни одела за „преживување“, дизајнирани за лансирање, повторно влегување и потенцијални итни случаи како што е декомпресија на кабината.
Следната голема пресвртница се очекува во вторник после полноќ, кога, доколку мисијата продолжи според планот, екипажот би можел да патува подалеку од Земјата од кој било човек досега.
Се очекува астронаутите да поминат зад Месечината, каде што привремено ќе ја изгубат комуникацијата со Земјата.
НАСА соопшти дека податоците собрани за време на мисијата ќе бидат критични за идните лунарни операции, вклучувајќи ги мисиите Артемис III и Артемис IV подоцна оваа деценија.
