Мултилингвалноста го забавува процесот на когнитивно стареење
Истражувањето спроведено од Тринити колеџот во Даблин врз повеќе од 86.000 возрасни лица во 27 европски земји покажа дека луѓето кои редовно зборуваат неколку јазици стареат побавно во просек
Мултилингвалноста може да го одложи когнитивното стареење и евентуално да заштити од деменција, а ефектот дури се зголемува со бројот на јазици што некое лице ги зборува, покажува истражувањето на колеџот Тринити во Даблин, објавено во списанието Природно стареење (Nature Aging).
Истражувањето спроведено врз повеќе од 86.000 возрасни лица во 27 европски земји покажа дека луѓето кои редовно зборуваат неколку јазици стареат побавно во просек.
Меѓународниот тим предводен од Агустин Ибанез ја споредил хронолошката возраст на учесниците со биолошките податоци и модели на однесување, вклучувајќи здравје, фитнес, начин на живот и социјална активност.
Потоа пресметале дали поединците се биолошки помлади или постари од нивната хронолошка возраст.
Учесниците биле на возраст помеѓу 50 и 90 години.
Лицата што зборуваат повеќе јазици имаат значително помала веројатност да доживеат забрзано стареење од оние кои зборуваат само еден јазик. Покрај тоа, ефектот не запира на два јазика, а секој дополнителен јазик го засилувал заштитниот ефект, открија истражувачите.
Петер Берлит, генерален секретар на Германското невролошко друштво (ДГН), кој не бил вклучен во студијата, рече дека истражувањето укажува и на заштита од деменција.
„Оваа студија ги потврдува помалите опсервациски студии кои покажаа дека повеќејазичноста се чини дека е заштитен фактор против деменција“, рече Берлит.
Иако студијата не вклучувала луѓе со деменција, тој рече дека постојат важни индикации за механизми кои би можеле да го намалат ризикот од когнитивен пад во староста.
„Користењето повеќе јазици го зголемува отпорот кон когнитивен пад“, заклучи Берлит.
Научниците сега планираат да истражат дали учењето нови јазици подоцна во животот има ист заштитен ефект како и повеќејазичностa стекната во рани години.
„Идните студии треба да направат разлика помеѓу јазиците што се учат во детството и оние што се учат во старост. Верувам дека и двата се ефикасни, но сепак треба да се докаже“, рече Берлит.
Во секој случај, додава Берлит, учењето нов јазик е едноставна и многу ефикасна препорака за превенција од деменција и тоа е мерка на здравствената политика што секој може да ја спроведе.