По цела година политичка неизвесност и десетици неуспешни обиди да се конституира новиот состав на Парламентот на Косово, вечерва тоа конечно се случи, а пратениците само неколку часа подоцна ја избраа новата влада, која повторно ќе ја предводи лидерот на Самоопределување, Албин Курти.

За изборот на новата Влада гласаа 66 пратеници, а 49 биле против.

Новата влада не вклучува претставници на Српската листа, иако има девет од 10 мандати загарантирани за Србите, а Ненад Рашиќ од партијата „За слобода, правда и опстанок“, која има само еден мандат, беше избран за министер за заедници и враќање.

Новата влада на привремените институции има 19 министри и три вицепремиери со Гљаук Коњуфца за министер за надворешни работи, Ејуп Маќедончи за министер за одбрана и Џељаљ Свечља за министер за внатрешни работи.

По последните редовни парламентарни избори во февруари лани, Косово имаше привремена влада и целосно нефункционален парламент, откако партијта на Курти не успеа да обезбеди мнозинство.

Следеа долги натегања, од кои произлегоа новите избори во декември, на кои Самоопределување освои 57 пратенички места во законодавниот дом со 120 пратеници.

Курти во обраќањето пред пратениците порача дека во следните четири години владата „ќе ги зајакне сојузите со Западот“, ќе инвестира една милијарда евра во одбраната, ќе го продолжи дијалогот со посредство на Европската Унија со Србија и ќе продолжи со инвестиции во социјална помош, образованието и инфраструктурата.

Прв вицепремиер и министер за надворешни работи и дијаспора е Глаук Коњуфца, втор вицепремиер и министер за правда – Доника Гервала, а трет вицепремиер за прашања на малцинствата и соработката ќе биде Фикрим Дамка.