Четири нови онлајн услуги од Фондот за здравствено осигурување (ФЗО) од денеска се достапни на националниот портал за електронски услуги uslugi.gov.mk. Три услуги се наменети за физички лица, а една за правни лица, информираа министерот за дигитална трансформација Стефан Андоновски и директорот на ФЗО Сашо Клековски на прес-конференција во Владата.
Новите онлајн услуги значително го поедноставуваат пристапот до клучни документи,го намалуваат административниот товар за граѓаните и институциите и го елиминираат непотребното чекање на шалтерите.
„Посебен акцент беше ставен на воведувањето на единствената најава. Корисниците на порталот на Фондот за здравствено осигурување автоматски се воведуваат во системот за единствена најава – ССO,“ рече Андоновски, додавајќи дека „граѓаните добиваат можност со еден кориснички профил непречено да се движат и користат услуги на различни институционални портали, без повторно најавување и без дополнителни административни бариери.“
За физичките лица преку порталот се воведени следните електронски потврди:
Потврда за пријави и одјави во задолжително здравствено осигурување
Потврда за осигурено или неосигурено лице и платен придонес
Потврда за исплатен надоместок за плата за време на привремена спреченост од работа
За првпат, за правните лица е овозможена електронска услуга за издавање потврда за платен придонес за задолжително здравствено осигурување. Услугата е целосно дигитализирана и достапна 24/7, без потреба од физичко присуство на шалтерите.
ФЗО од денеска е технички поврзан со Централниот регистар на населението, што овозможува автоматско преземање релевантни податоци за граѓаните.
Министерот за дигитална трансформација, Стефан Андоновски, вели дека целта е јавните услуги да бидат достапни, поврзани и ориентирани кон потребите на граѓаните и бизнисите.
Хартиените услуги нема целосно да се укинат за постојните процедури, но дека новите услуги – како студентските ваучери – ќе бидат целосно дигитални.
Клековски најави дека наскоро ќе бидат дигитализирани уште 27 услуги, меѓу кои поднесување барања за рефундација за лекови, ортопедски помагала и пелени, барања за лекување во странство, како и дигитално следење на лекувањето и двојазични обрасци.
Во план е и комплетна дигитализација на боледувањата, вклучително и породилното отсуство и правата за родителство.
„Со вкрстување на бази на податоци ќе се спречат злоупотреби и ќе се олесни остварувањето на правата на граѓаните“, рече Клековски, кој додаде дека овие процеси се дел и од подготовките за идниот е-попис.
