Рускиот претседател Владимир Путин најави едностран прекин на огнот по повод православниот Велигден, кој треба да трае од 16 часот во сабота, 11 април, до крајот на недела, 12 април.
Според соопштението од Кремљ, во тој период ќе бидат прекинати сите воени дејствија на сите фронтови, а Русија очекува и Украина да постапи на ист начин и да прогласи примирје.
Путин им наредил на министерот за одбрана Андреј Белоусов и на началникот на Генералштабот Валериј Герасимов да ги запрат воените операции, но единиците да останат подготвени за можни провокации.
Украинскиот претседател Володимир Зеленски изјави дека Украина ќе го прифати примирјето и дека луѓето заслужуваат Велигден без закани и со реална шанса за мир.
Тој потсети дека пред три дена предложил прекин на огнот, под услов Москва да ги запре нападите врз енергетската инфраструктура, предлог кој бил пренесен преку Соединетите Американски Држави.
Зеленски додаде дека Украина, заедно со американските преговарачи, продолжува да работи на безбедносни гаранции, кои ги оцени како клучни за траен мир.
Ова не е првпат Москва да прогласува кратко велигденско примирје. И лани Путин најави сличен прекин на огнот, но и тогаш двете страни меѓусебно се обвинуваа за негово прекршување, а поширок договор не беше постигнат.
