Германскиот министер за економија Роберт Хабек остро ги критикуваше новите американски царини, предупредувајќи дека тие ќе им наштетат и на европската и на американската економија и ќе ја поттикнат инфлацијата.

„За американските потрошувачи ова ќе биде Ден на инфлацијата, а не Ден на ослободувањето“, рече Хабек.

„Американската тарифна манија може да започне надолна спирала, влечејќи ги земјите во рецесија и предизвикувајќи огромна штета низ целиот свет, со страшни последици за многу луѓе“, предупреди тој.

Американскиот претседател Доналд Трамп синоќа најави огромни царини против десетици земји и економски региони, вклучително и Европската унија.

Увозот од ЕУ ќе се соочи со дополнителни царини од 20 проценти, додека многу други земји се соочуваат со минимална стапка од десет проценти.

Хабек истакна дека Германија и ЕУ постојано ги поддржуваат преговорите, а не конфронтациите со американската администрација.

„Тоа останува примарен пристап. Добро е што Европската комисија продолжува да се залага за договорено решение со САД. Има уште време. Но, ако САД не сакаат договорено решение, ЕУ ќе даде избалансиран, јасен и решителен одговор“, рече тој.

Тој укажа на важноста на единството меѓу членките на ЕУ во одговорот на американските царини.

„Ние го имаме најголемиот заеднички внатрешен пазар во светот. Мора да ја искористиме оваа сила“, заклучи Хабек.