Европската унија ќе употреби 1,4 милијарди евра камата заработена од замрзнатите руски средства за да ѝ помогне на Украина, соопшти Европската комисија.

Парите, префрлени на блокот на 3 август, доаѓаат од каматата за дел од средствата на руската Централна банка што ЕУ ги замрзна по инвазијата на Москва во Украина, додаде Комисијата.

„Русија мора да плати за уништувањето што го предизвика. И ние ги користиме приходите од замрзнатите руски средства за да го обезбедиме тоа“, рече претседателката на Европската комисија, Урсула фон дер Лајен.

„И ставаме на располагање дополнителни 1,4 милијарди евра на Украина. Ова ќе го поддржи континуираниот отпор на Украина против нелегалната војна на Русија“, додаде таа.