Грчкиот премиер Киријакос Мицотакис денес ја отфрли можноста парламентарните избори во таа земја да се одржат наесен и нагласи дека владата ќе го отслужи својот четиригодишен мандат, односно дека изборите ќе се одржат во 2027 година.

Во интервју за телевизијата „Опен“, Мицотакис рече дека владата што ја предводи е посветена на спроведување на планираните проекти и реформи до крајот на четиригодишниот мандат и дека не планира да оди на предвремени избори, пренесува Прототема.

Тој ги отфрли обвинувањата во медиумите што ја поврзуваат зголемената мобилност на владата со одржувањето предвремени избори и додаде дека планирањето на проектите и реформите не е определено од изборниот циклус.

„Тие (изборите) нема да се одржат наесен. Владата не ја запира својата работа затоа што влеговме во четвртата година од нашиот мандат“, рече Мицотакис.

Тој нагласи дека, во земја која скапо платила за фискалните пречекорувања и големи долгови, предизборните обврски мора добро да се оценат и спроведат.

„Многу е лесно во сегашната ситуација да се зборува за мерки за кои знаете дека нема да ги спроведете. Нема да бидам во искушение да го отворам паричникот и да ветам работи што нема да ги спроведам“, рече Мицотакис, зборувајќи за претстојната изборна кампања.

Тој потсети дека минатата година владата одлучила да ги поддржи претежно младите луѓе и семејствата со деца, и дека вработените виделе вистинско зголемување на нивните први плати.

„Ќе го дистрибуираме секое евро што го имаме. Дискусијата не може да се базира на измислени очекувања“, рече Мицотакис.

Мицотакис, кој е и претседател на Нова демократија, нагласи дека независноста останува остварлива цел на таа партија.

Тој рече дека предвидувањата за постизборна соработка се „забавни“ и дека никој не може да ја прејудицира волјата на народот на изборите.

Зборувајќи за соработката со други партии по изборите, Мицотакис рече дека „моментално нема партија“ со која Нова демократија може да соработува.

„Не можам однапред да го предвидам резултатот. Ќе ја почитуваме пресудата на грчкиот народ“, рече Мицотакис.

Тој ја обвини централно-левичарската партија ПАСОК за тешкотијата во обезбедувањето големо мнозинство за уставната ревизија, велејќи дека е „апсурдно што ПАСОК се согласува со многу“ од она што го предложи Нова демократија, а потоа не гласа за тоа.