Израелскиот министер за национална безбедност и лидер на екстремно десничарската партија Еврејска сила, Итамар Бен Гвир подготвил план за преселување на околу 1,86 милиони Палестинци од Појасот Газа во период од седум години, кој планира да го претстави денес како дел од својата изборна кампања, објави локален медиум.

Бен Гвир на јавноста ќе ѝ го претстави планот наречен „Раздвојување 710“, заснован врз концептот на „доброволна миграција“ од Газа, објави израелскиот весник Једиот Ахронот.

Според наводите, планот предвидува 250.000 Палестинци да ја напуштат Газа во првата година, 1,11 милиони во рок од три години и околу 1,86 милиони во рок од седум години.

Бен Гвир планира иницијативата да стане централен дел од неговата изборна кампања откако со месеци работел на неа, се додава.

Неговата партија Еврејска сила, исто така, планира усвојувањето на иницијативата да биде едно од клучните барања во сите преговори за влез во следната израелска Влада, се наведува во извештајот.

Планот предвидува за секој поединец или семејство што ќе ја напушти Газа да биде обезбедена земја-дестинација, заедно со правен статус, документација, визи, средства за патување и почетно сместување.

Исто така, предвидува стручна обука, помош при вработување и поддршка во период до 24 месеци, според наводите.

Планот се темели на 12 принципи, вклучително и она што го нарекува „доброволно заминување“, како и условот „никој да не замине без земја подготвена да го прими и да му обезбеди регулиран правен статус“, според извештајот.

Планот дополнително предлага „исплати“ на земјите и субјектите што ќе ги примат лицата што ја напуштаат Газа, врз основа на „нивната успешност, индивидуалните безбедносни проверки и годишните цели за спроведување“.

Исто така, се повикува на „месечни извештаи за бројот на апликации, одобренија и заминувања“, како и за „трошоците и степенот до кој лицата што заминале се интегрирани во земјите-дестинации“.

За воспоставување и започнување на планот би била потребна почетна израелска инвестиција од 10 милијарди шекели (3,1 милијарда долари), според наводите.

Планот, исто така, предвидува израелска финансиска рамка до 50 милијарди шекели (15,6 милијарди долари), во зависност од меѓународното учество и договорите со земјите-дестинации.

Во Појасот Газа моментално живеат повеќе од 2,2 милиони Палестинци.

Општите избори во Израел се закажани за 27 октомври. Актуелната Влада се опишува како најдесничарска во историјата на Израел.

Израел ја започна својата офанзива во Газа на 8 октомври 2023 година.

Офанзивата траеше две години и предизвика широко распространето уништување, додека израелските прекршувања продолжија и покрај прекинот на огнот што стапи на сила на 10 октомври 2025 година.