Ерменскиот премиер Никол Пашинјан денеска изјави дека парафираниот мировен договор со соседен Азербејџан би можел да биде потпишан во периодот 2027–2028 година, пренесе државната новинска агенција „Арменпрес“.
Одговарајќи на прашање за договорот за време на брифинг за новинарите, Пашинјан рече дека Ереван треба да продолжи да соработува со Баку.
На 8 август 2025 година, претседателот на Азербејџан, Илхам Алиев, и Пашинјан парафираа договор, а заедно со Трамп потпишаа и заедничка декларација на самит во Белата куќа. Целта е да се стави крај на деценискиот конфликт, при што се преземаат обврски за прекин на непријателствата, повторно отворање на транспортните рути и нормализирање на односите.
Во тој контекст, Пашинјан истакна дека е важна и имплементацијата на „Трамповата рута за меѓународен мир и просперитет“ (TRIPP) – проект за транзитен коридор што го поврзува Азербејџан со неговата автономна ексклава Нахчиван преку јужна Ерменија.
„Се разбира, едното нема врска со другото, но сега започнуваме со спроведување на проектот TRIPP“, рече Пашинјан.
Пашинјан изјави дека не ја исклучува можноста за одржување предвремени парламентарни избори со цел усвојување нов Устав. Тој додаде дека „во блиска иднина“ ќе биде објавен нацртот на новиот документ, по што ќе започнат дискусии, а потоа тој ќе биде доставен до парламентот.
„Ќе се обидеме да ги убедиме нашите колеги од опозицијата дека ова е многу важно и фундаментално прашање, кое се однесува на утврдувањето и решавањето на прашањето за континуитетот на ерменската држава. Ќе се обидеме да ги убедиме. Ако тоа не успее, ќе пристапиме кон други сценарија, вклучително и одржување предвремени избори“, рече тој.
Претходно истиот ден, Пашинјан изјави дека се влегува во фазата на имплементација на проектот TRIPP. За време на работната посета на најјужната провинција Сјуник, тој најави дека во блиска иднина ќе биде формирана компанија за развој на овој проект.
„Во суштина, сега сме во завршна фаза од формирањето на компанијата. Откако таа ќе биде основана, сите досегашни активности – вклучително и оние што претставуваат наш придонес – ќе бидат префрлени на компанијата“, додаде тој.
