Бран лажни закани со бомби продолжи во петокот од Данска до Португалија, откако многу авиони во Европа мораа да бидат пренасочени или придружувани од борбени авиони од почетокот на неделата, јавуваат агенциите.

Канцеларијата на францускиот премиер објави дека во петокот биле упатени четири нови закани со бомби до авиони што летаат над француска територија.

Данската полиција објави во петокот дека истражува закани за воздушниот сообраќај на аеродромот во Копенхаген, но изјави дека според моменталната проценка нема непосредна опасност за патниците.

„Денес повторно сме на аеродромот во Копенхаген поради закани за воздушниот сообраќај“, соопшти полицијата во Копенхаген. „Моментално го истражуваме инцидентот и има видливо полициско присуство на аеродромот“.

Полицијата одби да даде дополнителни детали.

Аеродромот во Копенхаген го потврди присуството на полицијата во соопштение испратено по е-пошта и рече дека аеродромот работи нормално.

Портпаролот на аеродромот одби да коментира понатаму за случајот.

Во четврток, воен тим за отстранување експлозиви претресе два авиона на најголемиот аеродром во Данска откако доби закана, но не беа пронајдени никакви направи.

Закани со бомба на најмалку осум летови во Прага

Чешката полиција во петокот соопшти дека добила пријава за закана со бомба на најмалку осум летови што полетуваат и слетуваат на аеродромот во Прага, додавајќи дека се преземени безбедносни мерки за да се минимизира влијанието врз работењето на аеродромот.

Портпаролот на аеродромот изјави дека досега не се пронајдени експлозивни направи во ниту еден проверен авион и дека ниту еден лет не е откажан или пренасочен.

Заканите се однесуваат на летови од Данска, Шпанија и Велика Британија.

Што се однесува до појдовните летови, тие се до Холандија, Кипар, Романија, Италија и Велика Британија, изјави портпаролот на аеродромот.

Лажните закани со бомба го нарушуваат воздушниот сообраќај во Европа

Италијанската агенција AНСA објави дека летот на Виз Ер од Прага до Рим бил пренасочен кон Венеција, каде што слета безбедно, откако италијанската контрола на летање добила закана за бомба преку телефонски повик.

Лет на РајанЕр што требало да полета од Лисабон за Рим, исто така, добил закана за бомба што се покажала како лажна, објави португалската полиција.

Околу дваесет лажни закани го нарушија воздушниот сообраќај во Европа од почетокот на неделата.

Хрватски „Рафал“ исто така полета во четврток за да пресретне патнички авион на финската компанија „Финер“ поради дојава за можна закана и го придружуваше до границата со Италија.