Сијарто: Ќе ставиме вето на предложените царини на феролегури во ЕУ
„Царините и санкциите веќе нанесоа огромна штета на европскиот економски систем и дефинитивно не ни требаат нови“, додаде унгарскиот прв дипломат
Унгарија повторно ќе го употреби право на вето, односно ќе гласа против предлогот на Европската комисија за воведување нови царини на увозот на феролегури, откри унгарскиот министер за надворешни работи Петер Сијарто.
„Брисел едноставно не може да се смири. Европската комисија сега сака повторно да воведе нови царини, овој пат на увозот на феролегури. Тоа ќе предизвика нов бран поскапувања затоа што овие суровини се користат во многу индустриски сектори“, напиша Сијарто на американската платформа за социјални медиуми Х.
Феролегурите се клучни материјали во производството на челик и во други стратегиски индустриски процеси.
Министерот рече дека претходно во текот на денот имал телефонски разговор со норвешката министерка за трговија Сесили Мурсет, при што уште еднаш го повторил унгарското противење на мерката пред гласањето.
„Царините и санкциите веќе нанесоа огромна штета на европскиот економски систем и дефинитивно не ни требаат нови“, додаде тој.
Сијарто упати и критики кон Европската комисија и нејзината претседателка Урсула фон дер Лајен, велејќи дека се „несоодветни за својата функција“ и дека „е време за промени во Брисел.“
Предлогот на Европската комисија за царините на феролегури се очекува да биде разгледан од земјите членки подоцна во текот на денот.