Научниците на чекор до универзална вакцина против настинки, грип, алергии и Ковид
Наместо да се обидува да имитира дел од патогенот, вакцината ги имитира сигналите што имунолошките клетки ги користат за да комуницираат едни со други за време на инфекцијата
Развојот на универзална вакцина против настинки, грип, Ковид и алергии постигна значителен напредок, веруваат научниците.
Експерти од Медицинскиот факултет на Универзитетот Стенфорд во САД развија универзална вакцина која може да се применува како назален спреј и може да заштити од широк спектар на респираторни вируси, бактерии и алергени.
Истражувањето, чии резултати биле објавени во списанието Наука (Science), беше спроведено на глувци и им обезбеди широка заштита на белите дробови неколку месеци.
Вакцинираните глувци биле заштитени од Ковид и други коронавируси, стафилококи, кои можат да ја инфицираат кожата и да предизвикаат сепса, бактеријата Ацинетобактер баумани (Acinetobacter baumannii) која може да предизвика инфекции на крвта, уринарниот тракт и белите дробови и грини од домашна прашина.
Доколку ваквите резултати се пренесат на луѓето, оваа вакцина би можела да ги замени повеќекратните годишни вакцини против зимски респираторни инфекции.
Исто така, потенцијално би можела да делува против нови пандемиски патогени, велат авторите.
Д-р Бали Пулендран, директор на Институтот за имунитет, трансплантација и инфекции на Универзитетот Стенфорд и главен автор на студијата, рече: „Мислам дека имаме универзална вакцина против различни респираторни закани“.
Замислете да добиете назален спреј во есенските месеци што ве штити од сите респираторни вируси, вклучувајќи Ковид, грип, респираторниот синцицијален вирус (РСВ, најчеста причина за бронхитис) и обичната настинка, како и бактериската пневмонија и раните пролетни алергени.
Тоа би ја променило медицинската пракса.
Истражувачите сега се надеваат дека ќе ја тестираат вакцината кај луѓето.
Д-р Пулендран верува дека две дози од назалниот спреј би биле доволни за да се обезбеди заштита кај луѓето и проценува дека, со доволно финансирање, вакцината би можела да биде достапна во рок од пет до седум години.
Премногу добро за да биде вистина?
Во студијата, научниците демонстрираа заштита кај глувци и покажаа дека корисните Т-клетки во белите дробови, кои се борат против патогените, можат да испраќаат сигнали до вродените имунолошки клетки за да ги одржат активни.
Значи, наместо да се обидува да имитира дел од патогенот, вакцината ги имитира сигналите што имунолошките клетки ги користат за да комуницираат едни со други за време на инфекцијата.
„Студијата што тврди дека постои универзална респираторна вакцина звучи премногу добро за да биде вистина, но истражувачите можеби смислиле нов концепт за вакцинација ако резултатите кај глувците се потврдат во идните студии врз луѓето“, рече Шат, професор по микробна патогенеза на Лондонската школа за хигиена и тропска медицина, кој не беше вклучен во студијата.
Концептот се базира на имитирање на сигналите што нашите имунолошки клетки ги користат за да нè заштитат, наместо на традиционалните вакцини кои се потпираат на компоненти на поединечни патогени.
Новата вакцина стимулира повеќе делови од имунолошкиот систем и се чини дека ја објаснува широката заштита кај глувците.
мЦомбриакс
Тоа е ветувачки пристап што би можел да има широка примена и важни импликации. Сепак, сè уште е рано, бидејќи истражувањето досега е спроведено само кај глувци, иако покажува добри имунолошки одговори.
Следната фаза би биле целосно контролирани испитувања на заштитата на вакцината, со директни споредби со постојните формулации на вакцини, но долг е патот пред да знаеме дали овој пристап произведува безбедна и ефикасна вакцина за луѓето.
Европската агенција за лекови (ЕМА) пак, во петокот препорача одобрување на комбинирана вакцина против коронавирус и сезонски грип, развиена од Модерна, за возрасни на возраст од 50 години и повеќе.
Вакцината, позната како мЦомбриакс (mCombriax), е првата комбинирана вакцина базирана на мРНA што добила позитивно мислење од европските регулатори, се вели во соопштението.
Клиничките податоци покажаа дека примателите на комбинираната вакцина генерирале имунолошки одговори споредливи со оние кои примиле одделни вакцини против грип и Ковид-19, соопштија европските здравствени власти.
Препораката на ЕМА сега оди до Европската комисија за конечно одобрување, чекор што е типично процедурален пред вакцината да може да се пласира на пазарот низ цела ЕУ.
Доколку биде одобрена, вакцината ќе биде достапна за употреба во сите земји-членки на ЕУ и во пошироката Европска економска зона, забележаа здравствените службеници, нудејќи нова алатка во напорите за заштита на постарото население од респираторни заболувања за време на врвните сезони.