Трамп: САД и Русија не треба да го продолжат договорот СТАРТ, туку да постигнат нов
Наместо да го продолжуваат Новиот СТАРТ, нашите нуклеарни експерти треба да работат на нов, подобрен и модернизиран договор што може да трае долго во иднина, рече Трамп
Американскиот претседател Доналд Трамп синоќа изјави дека САД и Русија не треба да го продолжат договорот за Новиот СТАРТ за нуклеарно оружје, за кој рече дека е „лошо договорен“, туку треба да постигнат нов договор во таа област.
„Наместо да го продолжуваат Новиот СТАРТ (лошо договорен договор од страна на САД, кој, меѓу другото, грубо се крши), нашите нуклеарни експерти треба да работат на нов, подобрен и модернизиран договор што може да трае долго во иднина“, рече Трамп во објава на неговата платформа Вистина (Truth Social).
Трамп во објавата, исто така, рече дека „спречил избувнување на нуклеарни војни низ целиот свет, меѓу Пакистан и Индија, Иран и Израел и Русија и Украина“.
„Соединетите Американски Држави се најмоќната земја во светот. Целосно ја обновив нејзината војска за време на мојот прв мандат, вклучувајќи ново и многу надградено нуклеарно оружје. Исто така, ги додадов и Вселенските сили и сега продолжуваме да ја обновуваме нашата војска на нивоа што не се видени досега“, рече Трамп.
Тој додаде дека американската морнарица ќе добие борбени бродови „кои се 100 пати помоќни“ од оние што пловеле по морињата за време на Втората светска војна.
Новиот СТАРТ беше последниот билатерален договор што ги регулираше нуклеарните арсенали на големите нуклеарни сили, САД и Русија, и истече вчера откако САД не покажаа интерес за негово обновување.
Оригиналниот договор СТАРТ, потпишан во 1991 година од САД и Советскиот Сојуз, им забрануваше на двете земји потписнички да распоредат повеќе од 6.000 нуклеарни боеви глави.
Новиот СТАРТ, кој беше потпишан во 2010 година од тогашните претседатели на САД и Русија, Барак Обама и Дмитриј Медведев, стапи во сила на 5 февруари 2011 година и го ограничи бројот на распоредени стратешки нуклеарни боеви глави за секоја страна на 1.550.
Исто така, воспоставуваше одредена транспарентност, вклучително и пренос на податоци, известувања и инспекции на лице место.
Иако Русија го суспендираше договорот пред три години поради зголемените тензии околу војната во Украина, се веруваше дека двете земји сè уште го почитуваат договорот.
Договорот спречи неконтролирано акумулирање на нуклеарно оружје и им обезбеди на двете земји, кои имаат најголеми нуклеарни арсенали, мерки за транспарентност за да се избегне погрешно проценување на меѓусебните намери.