Израел се согласил да ги прекине воздушните напади врз Иран по барање на американскиот претседател Доналд Трамп, но ќе ја продолжи воената офанзива во Либан со полна сила, изјави во понеделник висок израелски функционер.

„На барање на Трамп, ги прекинуваме нападите врз Иран“, рекол функционерот во изјави објавени од израелскиот весник Једиот Ахронот.

„Во Либан, продолжуваме со полна сила според принципот дека ако тие ги таргетираат населбите, ќе возвратиме со напади врз Дахија, јужното предградие на Бејрут“, додаде тој.

Истиот функционер рече дека телефонскиот разговор меѓу премиерот Бенјамин Нетанјаху и Трамп бил генерално добар.

Израелскиот јавен радиодифузен сервис КАН, исто така повикувајќи се на неименуван израелски функционер, објави дека армијата ќе го прекине огнот кон Иран, но не и во јужен Либан.

Иранските вооружени сили претходно објавија дека ги прекинуваат нападите врз Израел, предупредувајќи дека ќе следи катастрофален одговор доколку продолжат израелските напади врз Либан.

Тензиите ескалираа во неделата кога Израел го бомбардираше либанскиот главен град Бејрут, и покрај прекинот на огнот што е во сила, по што Иран испука ракети во северен Израел. Израел потоа изврши неколку бранови воздушни напади врз Иран.

Според податоците од либанските власти, од 2 март во израелските напади врз Либан загинаа повеќе од 3.600 луѓе, беа повредени повеќе од 11.000, додека повеќе од 1,6 милиони луѓе се раселени.

Претседателот на САД, Доналд Трамп, ги повика Израел и Иран веднаш да ги прекинат непријателствата по размената на воздушни напади, рано наутро во понеделникот.

Регионот е во состојба на зголемена тензија од крајот на февруари, кога САД и Израел извршија воздушни напади врз Иран, што предизвика иранска одмазда против Израел и другите земји во регионот каде што се наоѓаат американските воени капацитети.

Привремено примирје беше постигнато на 8 април, но преговорите подоцна беа заглавени поради несогласувања околу неговото спроведување и последователните регионални настани.