Американскиот претседател Доналд Трамп денес изјави дека се работи на договорот за Гренланд и дека тој ќе биде „невероjaтно поволен за САД“.

„Враќање во Вашингтон. Беше неверојатно во Давос. Планот за Гренланд се изработува и ќе биде исклучително добар за САД, а Одборот за мир е нешто што светот никогаш порано не го видел - Многу посебно“, напиша Трамп на социјалните мрежи за време на враќањето во Вашингтон од Давос.

Тој додаде дека „се случуваат толку многу добри работи“.

Си-Ен-Ен претходно објави дека американскиот претседател Доналд Трамп и генералниот секретар на НАТО, Марк Руте, постигнале усмен договор за Гренланд за време на состанокот во среда, но сè уште не е изготвен никаков документ за идниот договор.

Според Си-Ен-Ен, кој се повикува на добро информирани извори,Трамп и Руте се согласиле да продолжат со понатамошни разговори за ажурирање на договорот од 1951 година меѓу САД, Данска и Гренланд, кој го регулира военото присуство на САД на островот.

Рамковниот договор, додадоа тие, гарантира дека на Русија и Кина ќе им биде забрането да вршат какви било инвестиции во Гренланд и предвидува зголемена улога на НАТО на арктичкиот остров.

Двајца извори рекоа дека друг елемент од евентуалниот договор е зголемениот пристап на САД до природните ресурси на Гренланд, вклучувајќи ги и неговите минерални резерви.

Сепак, Руте денес негираше дека разговарал за ова прашање директно со Трамп.