Министерот за надворешни работи на Иран, Абас Арагчи, ќе ги посети Исламабад, Мускат и Москва за да одржи билатерални консултации и да разговара за актуелните случувања во регионот, објавија државните медиуми.

„Целта на оваа посета е да се одржат билатерални консултации и да се разговара за актуелните случувања во регионот, како и за најновата ситуација во војната што ја наметнаа САД и израелскиот режим против Иран“, соопшти државната новинска агенција ИРНА.

Пакистанскиот главен град се подготвува за очекуваната втора рунда разговори меѓу САД и Иран, но не беше јасно дали Арагчи и делегацијата што го придружува ќе се сретнат со американски претставници за да разговараат за војната на Блискиот Исток.

Ал Џезира, пак, денеска објави оти постои голема веројатност дека иранска делегација предводена од Арагчи, ќе пристигне во Исламабад вечерва на преговори со САД, повикувајќи се на извори од пакистанската влада.

Порано денес, Арагчи одржа одделни телефонски разговори со својот пакистански колега Мохамед Ишак Дар и началникот на Генералштабот на Пакистан, Асим Мунир, за напорите за продолжување на примирјето меѓу Иран и САД.

Претходно, претседателот на иранскиот парламент и главен преговарач Мохамед Багер Калибаф изјави дека примирјето ќе има смисла само ако не биде прекршено со поморска блокада и „земање на светската економија како заложник“, додека американскиот претседател Доналд Трамп изјави дека „на неодредено време“ го продолжил прекинот на огнот со Иран.