Премиерот на Гренланд, Јенс-Фредерик Нилсен, денеска рано наутро ја нарече неодамнешната реторика на американскиот претседател Доналд Трамп за потребата од Гренланд „целосно неприфатлива“ и „непочитувачка“.

„Реториката од Соединетите Американски Држави е целосно неприфатлива. Кога американскиот претседател зборува за „потребата од Гренланд“ и нè поврзува со Венецуела и воена интервенција, тоа не е само погрешно. Тоа е непочитувачко“, објави Нилсен на социјалните медиуми.

Изразувајќи дека се дел од НАТО и свесни за својата стратешка локација, тој ја повтори важноста на „почитувачкиот и лојален однос“ со Вашингтон. Тој истакна дека „заканите, притисокот и разговорите за анексија немаат место меѓу пријатели“.

„Нашата земја не е предмет на реториката на големите сили. Ние сме народ. Земја. Демократија. Тоа мора да се почитува - особено од блиски и лојални пријатели“, нагласи Нилсен и додаде: „Доста е. Крај на притисокот. Крај на инсинуациите. Крај на фантазиите за анексија“, додаде Фредерик Нилсен.

Тој нагласи дека се отворени за дијалог што би се водел преку „соодветни канали и во согласност со меѓународното право“.

„А соодветните канали не се случајни и непочитувачки објави на социјалните медиуми. Гренланд е наш дом и наша територија. И така ќе остане“, рече Нилсен.

Данската премиерка Мете Фредериксен пак ги повика САД да „ги прекинат заканите“ против „историски близок сојузник“ и против друга земја и друг народ кои како што рече многу јасно ставија до знаење дека не се на продажба.

„Апсолутно нема смисла да се зборува за тоа дека е неопходно САД да го преземат Гренланд. САД немаат правна основа да анектираат една од трите земји од Кралството Данска, Гренланд и Фарските Острови“, рече Фредериксен.