Полска ќе остане ослободена од задолжителниот систем за релокација на мигранти на ЕУ сè додека продолжува да прима голем број украински бегалци, изјави министерот за надворешни работи Радослав Сикорски денес.
Во разговор за приватниот радиодифузер Полсат њуз, Сикорски рече дека ослободувањето не е трајно, туку ќе трае „добри неколку години“, објави ТВП Ворлд.
Тој истакна дека присуството на милиони Украинци во Полска претставува „огромен миграциски притисок“, признат и од Брисел.
„Иако имаме огромен број бегалци, Европа треба да покаже солидарност со нас“, рече тој.
„Денес ЕУ го признава тоа, и оваа година, и сè додека Украинците се тука, ние сме ослободени од тој механизам.“
ЕУ се подготвува да го спроведе својот Пакт за миграција, голема реформа на системот за управување со азил и миграција на блокот, насочена кон ублажување на притисокот врз државите на првата линија и порамномерна распределба на барателите на азил.
Според планот, владите на ЕУ мора да придонесат во „Солидарниот базен“ преку една од трите опции: прифаќање на преместени баратели на азил, плаќање финансиски придонес наместо преместување или обезбедување оперативна помош на надворешните граници на блокот.
Полска е меѓу шесте земји-членки кои имаат право да побараат ослободување од обврските поради она што Европската комисија го смета за „зголемен миграциски притисок“.
Другите земји се Австрија, Бугарија, Хрватска, Чешка и Естонија, кои сите примија значителен број Украинци кои бегаат од војната во Русија.
Заменик-министерот за внатрешни работи, Мацеј Душчик, потврди во четврток дека Варшава формално го поднела своето барање за целосно ослободување од механизмот на солидарност.
Тој рече дека барањето ќе биде дискутирано на состанокот на Советот за правда и внатрешни работи на ЕУ на 8 и 9 декември, иако на таа седница не беше загарантиран дефинитивен одговор.
„Ќе видиме дали тој процес ќе заврши (тогаш)“, изјави Душчик пред новинарите, додавајќи дека министрите на ЕУ се должни да донесат одлука до крајот на годината.
Душчик изрази увереност дека полското ослободување ќе биде одобрено, велејќи дека „не гледа никаква опасност, ниту причина зошто тоа барање не треба да биде одобрено“.
