Францускиот претседател Емануел Макрон денес ги повика Иран и Соединетите Американски Држави заеднички да го отворат Ормускиот теснец, откако американскиот претседател Доналд Трамп најави дека морнарицата на САД ќе ги извлече блокираните бродови, но без француско учество.

Макрон, во изјава пред почетокот на Самитот на Европската политичка заедница (ЕПЗ) во Ереван, ја отфрли можноста за какво било учество на Франција во Проектот за слобода, што синоќа го најави Трамп, за враќање на слободата на пловидба во Ормускиот теснец.

„Нема да учествуваме во никакви насилни операции, особено затоа што рамката за ова не ни е јасна“, рече Макрон.

Осврнувајќи се на ситуацијата на Блискиот Исток, тој исто така оцени дека е клучно да се почитува примирјето меѓу Израел и Либан.

„Тоа е обврска што ја презедоа страните и го кажувам ова заради суверенитетот, независноста на Либан и заштитата на цивилното население“, рече Макрон.

Минатата недела, пак, беше формирана меѓународна коалиција од десет европски држави, предводена од Франција и Обединетото Кралство за неутрално поморско распоредување во теснецот по завршувањето на борбите.

„Военото планирање се одржа во Лондон, но пред сè сакаме координирано повторно отворање на теснецот меѓу Иран и САД. Тоа е единственото решение што овозможува отворање на Ормускиот теснец на долг рок, обезбедувајќи слободна пловидба без ограничувања и без наплата на такси“, изјави францускиот претседател/