Апелациониот суд во Париз го одобри условното ослободување на Саркози

Апелациониот суд во Париз денес го одобри барањето на поранешниот француски претседател Никола Саркози да биде условно ослободен, што значи дека тој денес ќе го напушти затворот Ла Санте.

Во пресудата се наведува дека „нема ризик од прикривање докази, притисок или соучество“ и дека „продолжениот притвор не е оправдан“, објавува „Ле Фигаро“.

На Саркози му е доделен судски надзор, што значи дека нема да може да ја напушти Франција.

Исто така, му е забрането да контактира со францускиот министер за правда Жерал Дарманин, кој го посети во затвор кон крајот на октомври.

Саркози побара од судот да биде условно ослободен додека го чека исходот од неговата жалба против затворската казна, само неколку недели откако почна да ја отслужува петгодишната казна за заговор за собирање средства за изборна кампања од Либија.

Зборувајќи на сослушувањето преку видео врска од затвор, Саркози рече дека ќе ја почитува секоја одлука на судството доколку биде ослободен.

Зборувајќи за времето поминато во затвор, Саркози рече дека било „навистина тешко, како што мора да биде за секој притворен“ и дека било „исцрпувачко“.

Поранешниот конзервативен претседател беше прогласен за виновен за нелегално собирање средства за кампањата за претседателските избори во 2007 година, кои ги добил од покојниот либиски лидер Моамер Гадафи.

Тој беше ослободен од сите други обвиненија, вклучувајќи корупција и примање нелегално финансирање на кампањата.

Јавниот обвинител денес, исто така, препорача Саркози да биде ослободен, но ставен под строг судски надзор со забрана за контакт со други обвинети и сведоци вклучени во судењето.

Саркози постојано негираше какво било кривично дело, велејќи дека е жртва на одмазда и омраза.