Најмалку 22 лица загинаа, а околу 55 се повредени денес откако градежен кран падна врз патнички воз во Североисточен Тајланд, јави државната телевизија Thai PBS.

Несреќата се случила во округот Сикио во покраината Након Рачасима кога специјалниот експресен воз број 21, кој сообраќал од главниот град Бангкок до покраината Убон Рачатани, минувал низ областа кога голем градежен кран паднал врз еден од неговите вагони.

Возот превезувал околу 195 патници и персонал.

Кранот се користел за изградба на мост за брза железница, а ударот од неговиот пад ги исфрлил од шините вагоните на возот, по што избувнал пожар во нив.

Започната е спасувачка операција откако екипите пристигнаа на местото на настанот, а десетици повредени лица се пренесени во блиските болници.