Претседателот на САД, Доналд Трамп, го поддржа министерот за одбрана Пит Хегсет, откако сопартиецот, републиканскиот претставник Томас Маси започна постапка за импичмент против Хегсет.

Покренувањето постапка за импичмент ќе доведе до гласање за довербата за Хегсет, кој е обвинет за кршење на федералниот закон и Уставот, како и за злоупотреба на своите овластувања во неколку области.

„Досега имаме најголем број заинтересирани. Сè повеќе луѓе сакаат да служат во армијата, морнарицата, воздухопловните сили, маринците, Крајбрежната стража, па дури и во полицијата, вселенските сили, противпожарните служби - накратко, каде и да се носи униформа. Сега имаме најголем број досега. И ќе ви кажам следново: Војниците, вистинските војници, тие големи луѓе кои ја завршуваат работата, тие големи патриоти, тие го сакаат Пит Хегсет. И ако се вратиме две години назад, пред да ја преземам функцијата, пред две години, не можевме да регрутираме луѓе“, рече Трамп.

Изјавата на претседателот на САД следи откако републиканскиот конгресмен од Кентаки, Томас Маси, поднесе осум обвиненија за импичмент против министерот за одбрана Пит Хегсет, што би можело да предизвика гласање во Претставничкиот дом уште оваа недела.

Маси ги изнесе обвиненијата во Претставничкиот дом, тврдејќи дека Хегсет ги ангажирал американските сили во борбени операции против Иран без одобрение од Конгресот.

Обвиненијата, според Маси, вклучуваат три прекршувања на Законот за воени овластувања од 1973 година.

Хегсет рече дека ќе се осврне на прашањето утре, што е неговата прва прес-конференција по месеци.

Маси, кој често се судираше со претседателот Доналд Трамп и покрај тоа што е во истата партија, предупреди дека неговото барање за импичмент е „само многу блага верзија на она што ќе се случува кога демократите ќе ја преземат контролата врз Претставничкиот дом и Сенатот“.

Тој го повика Трамп да го отпушти Хегсет додека сè уште може да обезбеди потврда од Сенатот за неговата замена.

По изборите на 3 ноември, демократите повторно добија мнозинство и во Претставничкиот дом и во Сенатот, а новиот Конгрес ќе положи заклетва и ќе започне со работа во јануари.

Републиканците моментално имаат мнозинство во двата дома, а Сенатот е клучен бидејќи членовите на кабинетот мора да бидат потврдени од тоа тело за да ја извршуваат функцијата.

Едноставно мнозинство во Претставничкиот дом, кој е под контрола на републиканците, би било доволно за да се покрене постапка за импичмент против Хегсет и да се испрати случајот во Сенатот на судење.

За неговото конечно отстранување од функцијата би било потребно двотретинско мнозинство во Сенатот, исход што се чини неверојатен во тековната сесија на Конгресот.

Масие изјави дека „кршењата на Уставот од страна на Хегсет одат многу подалеку од нелегалната војна во Иран“.

Демократите, од друга страна, подготвуваат серија сослушувања и истраги насочени кон администрацијата на Трамп.