Сијарто: МОЛ пред договор со Гаспромнефт за купување на НИС

Унгарскиот министер за надворешни работи и трговија, Петер Сијарто, изјави дека унгарската нафтена компанија МОЛ е во интензивни преговори со државната нафтена компанија на Обединетите Арапски Емирати АДНОК за соработка поврзана со Нафтената индустрија на Србија (НИС), објавија српските медиуми во петок.

Зборувајќи за намерата на Србија да го зголеми сопственичкиот удел во НИС, Сијарто рече дека таков потег е математички можен, но дека одлуките за деталите ќе зависат целосно од МОЛ.

Сијарто изјави за Радио Телевизија Србија дека постои реална можност МОЛ да постигне клучен договор со руската компанија Гаспромнефт во следните еден до три дена за купување на мнозински удел во НИС, додавајќи дека преговорите напредуваат брзо.

Според него, Унгарија му дава дипломатска поддршка на MOЛ бидејќи евентуалното стекнување на мнозински удел во НИС би овозможило интегрирано работење на нафтените пазари на Унгарија, Словачка и Србија, што значително би ја подобрило енергетската безбедност на регионот.

Сијарто нагласи дека рафинеријата Панчево ќе игра клучна улога во овој процес, заедно со рафинериите во Братислава и Унгарија, и ги отфрли обвинувањата за нејзино можно затворање како неточни.

Коментирајќи ја изјавата на српскиот претседател Александар Вучиќ дека државата сака да го зголеми својот удел во НИС за пет проценти, Сијарто рече дека најважно за MOЛ е да го задржи мнозинскиот удел, што ја прави таквата промена можна.

Зборувајќи за плановите за изградба на нов нафтовод меѓу Унгарија и Србија, Сијарто нагласи дека диверзификацијата на патиштата за снабдување е клучна за енергетската безбедност, наведувајќи дека Унгарија силно го поддржува проектот.

Тој додаде дека е договорено да се потпише меѓувладин договор што ќе му даде приоритетен статус на изградбата на нафтоводот, со цел проектот да се заврши до 2028 година.

Сијарто, исто така, рече дека се разгледува изградбата на цевковод за транспорт на нафтени производи помеѓу Унгарија и Војводина, што дополнително би придонело за енергетската стабилност на двете земји.

Осврнувајќи се на енергетската политика на Европската Унија, Сијарто оцени дека третирањето на енергијата како идеолошко прашање е сериозна грешка, нагласувајќи дека снабдувањето со енергија треба да се гледа исклучиво низ призмата на сигурност и цена, без политички и идеолошки критериуми.

Србија моментално поседува околу 30 проценти од акциите во НИС, додека рускиот сопственик има повеќе од 56 проценти, а остатокот им припаѓа на помалите акционери.

САД воведоа санкции врз НИС на почетокот на октомври поради нејзиното мнозинско руско сопствеништво, по што Рафинеријата Панчево привремено ги прекина операциите поради прекин на снабдувањето со сурова нафта.

Министерството за финансии на САД издаде посебна лиценца кон крајот на декември што ѝ овозможи на НИС да продолжи да работи до 23 јануари 2026 година.