Унгарија не поддржува забрзан процес на пристапување кон Европската Унија (ЕУ) за ниту една земја кандидат, изјави унгарскиот премиер Петер Маѓар по состанокот со претседателот на Европскиот совет, Антонио Коста.

Маѓар денеска на Фејсбук објави дека со Коста разговарал за проширувањето на ЕУ и го повтори ставот на Будимпешта дека не поддржува забрзан процес на пристапување за „ниту една земја кандидат“.

Зборувајќи за миграцијата, тој нагласи дека Унгарија стои зад законските мерки и физичката бариера на границата што ги смета за неопходни за запирање на нелегалната миграција, особено по настаните во шпанската енклава Сеута во Северна Африка.

„Унгарија ќе продолжи да ги штити заедничките граници на Европската Унија. Очекуваме нашите напори да бидат препознаени на европско ниво“, рече Маѓар.

Тој додаде дека Унгарија ќе може да го прифати новиот седумгодишен буџет на ЕУ само ако постигнатиот компромис е во согласност со интересите на унгарските граѓани и компании.

Маѓар, исто така, рече дека Будимпешта очекува што е можно поскоро решение за суспензијата на дневната казна од милион евра што ѝ е наметната на Унгарија поради миграциската политика на претходната влада на Виктор Орбан.