Европската агенција за безбедност на храната (EФСA) во четврток процени дека употребата на аспартам-ацесулфам сол (E 962) како додаток во исхраната не претставува ризик за здравјето, но тој заклучок беше силно оспорен од независни невладини организации.
„Одобрено во бројни прехранбени производи и пијалоци без шеќер или со намалена енергетска вредност, како што се газирани пијалоци и јогурт, ова засладување се разградува на две супстанции по внесувањето во телото: аспартам и ацесулфам К“, потсетува EФСA, агенција со седиште во Парма, Италија.
Експертскиот панел на таа европска агенција не пронајде никакви безбедносни причини за загриженост во врска со моментално пријавените начини и нивоа на употреба на ацесулфам К (E 950), аспартам (E 951) и аспартам-ацесулфам сол (E 962).
Заклучокот се базира на претходно утврдениот Прифатлив Дневен Внес (ПДУ) за аспартам, кој беше поставен на 40 милиграми на килограм телесна тежина дневно и сега е потврден, како и неодамна ревидираната ПДУ за ацесулфам К од 15 милиграми на килограм телесна тежина дневно.
Според EФСA, моменталните проценки на изложеност за сите возрасни групи остануваат под тие нивоа на ПДУ.
Експертите препорачуваат ажурирање на спецификациите на Европската Унија за E 962 за да се усогласат со спецификациите за аспартам и ацесулфам К што се користат во неговото производство.
За невладините организации мислењето на EФСА скандалозно
За невладините организации Фудвоч (Foodwatch), Јука (Yuka) и Лигата против ракот, мислењето објавено во четврток е скандалозно бидејќи EФСA не гледа проблем со моменталната дневна потрошувачка на аспартам, иако здравствените ризици се документирани во неодамнешните независни научни студии.
Овие невладини организации во соопштението наведуваат дека повеќе од 400.000 луѓе во Европа ја потпишале нивната петиција со која се бара превентивна забрана на аспартамот во ЕУ.
Тие истакнуваат дека во 2023 година, Меѓународната агенција за истражување на ракот (ИAРЦ), која работи во рамките на Светската здравствена организација (СЗО), го класифицирала аспартамот како можен човечки канцероген врз основа на сеопфатна анализа на достапната независна научна литература.
