Американскиот претседател Доналд Трамп во средата потпиша извршна наредба со која го исполни ветувањето дека ќе воведе реципрочни царини за земјите ширум светот, потег што со месеци доведе до пад на пазарите.
Минимална основна царина од 10 проценти ќе биде наметната на сите земји, освен Канада и Мексико, со повисоки износи наметнати на нациите што Трамп ги смета за „најлоши“ трговски престапници.
Американскиот претседател рече дека неговиот нов економски напор има за цел да „помогне во изградбата на нашата економија“ преку зајакнување на домашното производство, зголемување на владините приходи и спречување на она што тој го нарече „измама“ во трговијата.
„Ова е еден од најважните денови, според мое мислење, во американската историја. Тоа е нашата декларација за економска независност“, рече тој.
Тој тврди дека овие царини „ќе ја вратат индустријата во САД“ и „ќе ги урнат странските бариери за меѓународната трговија“.
„Ќе ги освоиме отворените странски пазари и ќе ги срушиме надворешно-трговските бариери, а на крајот повеќе производство дома ќе значи посилна конкуренција и пониски цени за потрошувачите“, додаде тој.
На самиот врв е Камбоџа, со планирана тарифа од 49 отсто, потоа Виетнам со 46 отсто и Шри Ланка со 44 отсто. Зад нив се Бангладеш (37%), Тајланд (36%), Кина (34%), Тајван и Индонезија (32%), како и Србија со 37 проценти, Босна и Херцеговина со 35 проценти и С.Македонија со 33 отсто.
Треба да се напомене дека новите царини ја зголемуваат вкупната стапка на кинескиот увоз на 54 отсто, земајќи ги предвид претходните царини.
Серијата материјали дистрибуирани од Белата куќа до новинарите нагласуваат 20 отсто царини за стоки од Европската унија.
Околу 60 земји ќе се соочат со царини од повеќе од 10 отсто, изјави претставник на Белата куќа кој разговараше со новинарите под услов да остане анонимен.
Туркије е меѓу земјите кои ќе се соочат со царини од 10 отсто заедно со Обединетото Кралство, Кенија, Исланд, Панама, Етиопија, Либан, Того и други.
Канада и Мексико нема да подлежат на нов тарифен режим откако се соочија со претходни казни наметнати од Трамп во обид да ги притисне да ја спречат миграцијата и протокот на нелегален фентанил преку американската граница.
Официјалниот претставник рече дека, во случај постојните тарифи да бидат „отстранети или суспендирани, врз основа на нивното однесување, тие ќе го заобиколат овој друг режим“.
Пазарите значително потонаа од февруари, кога Трамп првпат ја објави својата намера да спроведе реципрочен тарифен план, поттикнат од загриженоста дека политиката ќе ги зголеми потрошувачките цени на широк опсег на стоки и евентуално ќе ги втурне САД во рецесија.
