„Туркиш ерлајнс“ и „ЦФМ Интернешнл“ потпишаа меморандум за разбирање за купување на повеќе од 300 мотори за авиони и долгорочни услуги за одржување што опфаќаат флота од над 600 мотори, објавија компаниите.
Новите мотори, вклучувајќи ги и резервните делови, ќе напојуваат до 150 авиони „Боинг 737 МАКС“ според нарачката објавена кон крајот на септември, која се состои од 100 цврсти нарачки и 50 опционални.
Договорот ќе ја опфати целата флота на мотори LEAP-1B на „Туркиш ерлајнс“ и нејзината подружница AJet, вклучувајќи ги претходно нарачаните или испорачани мотори, резервните мотори, оние што ги напојуваат изнајмените авиони и потенцијалните резерви.
Меморандумот, исто така, вклучува договор за материјални услуги со кој се поддржува воспоставувањето објект за одржување, поправка и генерален ремонт на мотори во Туркије.
Договорот беше потпишан на церемонија во Истанбул од страна на претседателот на „Туркиш ерлајнс“, Мурат Шекер, извршниот директор на „Туркиш техник“, Микаил Акбулут, и Оливие Андриес, извршен директор на „Сафран“, една од двете матични компании на ЦФМ.
Шекер рече дека договорот ќе ја поддржи растечката флота на авиокомпанијата, мрежата на летови и оперативната ефикасност.
„Задоволни сме што го зајакнуваме нашето партнерство со ЦФМ, со кого соработуваме многу години, преку сеопфатен пакет услуги“, рече тој.
„Оваа соработка ќе обезбеди експертиза, сигурност и поддршка потребни за развој на нашите капацитети за одржување, поправка и генерален ремонт на LEAP моторите“, додаде тој.
Акбулут рече дека „Туркиш Техник“ ќе ги прошири своите капацитети за одржување на мотори преку обезбедување сеопфатни услуги за LEAP мотори, а воедно ќе продолжи со инвестициите покрај своите воспоставени операции за одржување на авиони и компоненти.
Андриес го опиша договорот како уште една пресвртница во партнерството кое трае речиси четири децении, велејќи дека тоа ќе го поддржи растот на „Туркиш ерлајнс“ и проширувањето на флотата.
Претседателот и извршен директор на „ЏЕ Аероспејс“, Х. Лоренс Калп Џуниор, изјави дека соработката ќе ја поддржи проширувањето на мрежата на авиокомпанијата со седиште во Истанбул и развојот на нејзините капацитети за одржување на моторите.
Вклучувајќи ја и флотата на AJet, „Туркиш ерлајнс“ моментално управува со 96 авиони „Боинг 737 следната генерација“ со мотори CFM56-7B и 79 авиони „Боинг 737 MAX“ опремени со мотори LEAP-1B.
ЦФМ испорача повеќе од 10.000 LEAP мотори откако семејството мотори стапи во употреба пред една деценија, при што флотата акумулираше над 100 милиони часови лет, се вели во соопштението.
