Кинеските компании кои ги продаваат своите производи на Амазон се подготвуваат да ги зголемат цените во САД или да се повлечат од американскиот пазар поради невиденото зголемување на царините од страна на американскиот претседател Доналд Трамп, изјавија продавачите и претседателката на најголемата кинеска асоцијација за е-трговија.

Тарифната војна меѓу Вашингтон и Пекинг дополнително се вжешти бидејќи Трамп ја зголеми вкупната стапка на царини за увоз на кинески стоки на 145 отсто, 125 отсто реципрочни царини и претходните 20 отсто поврзани со кризата со дрогата фентанил.

„Тоа не е само даночен проблем, тоа е целосно преоптоварување на целата структура на трошоците“, рече Ванг Ксин, шеф на Здружението за прекугранична е-трговија- Шенжен, кое претставува повеќе од три илјади продавачи кои работат на Амазон.

„Ќе биде исклучително тешко за сите да преживеат на американскиот пазар“, изјави Ванг за Ројтерс, истакнувајќи дека новите давачки може да доведат до доцнење на царините и повисоки логистички трошоци.

„За сите нас кои денес се занимаваме со прекугранична е-трговија, ова е навистина удар без преседан“, рече Ванг, посочувајќи дека влијанието на тарифите врз малите кинески претприемачи и производители може да биде исклучително сериозно и да доведе до зголемена невработеност.

Кина е дом на речиси половина од продавачите на Aмазон

Таа рече дека некои продавачи планираат да ги зголемат цените во САД, додека други се обидуваат да најдат нови пазари. Ова во четвртокот за Ројтерс го потврдија пет трговци со седиште во јужниот кинески град Шенжен.

Кина е дом на речиси половина од продавачите на Амазон, а дури сто илјади бизниси кои работат на Амазон се регистрирани во Шенжен. 

Кинеските продавачи остваруваат приход од 35,3 милијарди долари годишно, според податоците од давателот на услуги за е-трговија СмартСкаут (SmartScout).

Кина е исто така дом на производствените бази на други големи платформи за е-трговија, како што се Шеин и Тему. 

Вредноста на увозот и извозот поврзани со прекуграничната трговија минатата година изнесуваше околу 385 милијарди долари, покажуваат податоците на Државниот совет на Кина.

Ниту една друга земја не е блиску до трошечката моќ на Америка, што значи дека остатокот од светот може да преземе само мал дел од производството, а постои и зголемен ризик од интензивирање на ценовните војни меѓу кинеските извозници, што ќе ја намали профитабилноста, анализира Ројтерс.

Од петте продавачи со кои разговараше новинската агенција, тројца рекоа дека ќе се обидат да ги зголемат цените на нивниот извоз во САД, додека двајца рекоа дека планираат целосно да го напуштат пазарот.

Производството во Кина за американскиот пазар е неодржливо

Дејв Фонг, чиј разновиден асортиман вклучува училишни чанти и блутут звучници, во четвртокот рече дека ги зголемил цените во САД до 30 отсто, дека ќе дозволи да падне нивото на залихи и ќе потроши помалку за рекламирање на Амазон, за коенекогаш трошел речиси 40 отсто од приходите од американскиот пазар.

„Ниту ние, ниту другите продавачи не можеме да се потпреме на американскиот пазар, тоа сега е јасно. Треба да ги намалиме инвестициите и да инвестираме повеќе ресурси во региони како Европа, Канада, Мексико и остатокот од светот“, рече Фонг.

Брајан Милер, кој продава на Амазон веќе седум години од неговата база во Шенжен, рече дека со оглед на моменталната клима, не гледа причина да развива нови производи и очекува дека тој и другите продавачи ќе мора нагло да ги зголемат цените откако ќе ги потрошат своите моментални залихи во следните неколку месеци.

Производството на детски коцки кои на Амазон се продаваат за 20 долари досега чинеше три долари, а отсега кога ќе се вклучат и царините ќе чини седум. 

„Ако треба да се задржат маржите, цените ќе треба да се зголемат за најмалку 20 отсто, а цените на поскапите играчки би можеле да пораснат и до 50 отсто“, рече Милер.

„Не гледам како би можело да биде одржливо производството во Кина за американски потреби, доколку ситуацијата не се промени, а производството наменето за американскиот пазар ќе мора да се пресели во други земји, како Виетнам или Мексико“, заклучи тој.

Извор: ХИНА