По повод најновото масовно убиство што се случи денес во средно училиште во австрискиот град Грац, каде што поранешен ученик на тоа училиште убил најмалку десет луѓе, а потоа извршил самоубиство, Ројтерс потсетува дека во пукотниците што се случија низ Европа во последните 40 години, вооружени лица убиле околу сто луѓе, вклучувајќи голем број малолетници и деца.

Масовни убиства се случиле во Белгија, Велика Британија, Франција, Германија, Финска, Словачка, Холандија, Норвешка, Хрватска, Шведска и Србија, а жртвите често биле ученици или студенти кои биле цел на своите врсници, додека еден од често повторуваните модели бил дека сторителите најчесто вршеле самоубиство откако го извршиле злосторството.

Во некои од најлошите масовни убиства во кои убиецот одбирал случајни жртви во мај 1987 година во Белгија, Михаел ван Вајненделе убил седум луѓе, а потоа се застрелал додека полицијата се обидувала да го натера да се предаде.

Во август истата година во Велика Британија, Мајкл Рајан (27) убил 16 лица и ранил 11 во Хангерфорд, пред да се самоубие.

Во јули 1989 година, француски земјоделец застрелал и убил 14 лица, вклучувајќи членови на неговото семејство, во селото Луксиол, во близина на швајцарската граница, додека во септември 1995 година, во истата земја, млад човек (16) убил 15 лица со пушка во градот Куерс, а потоа се самоубил по расправија со своите родители.

Во март 1996 година во Велика Британија, Томас Хамилтон застрелал 16 деца и еден наставник во основно училиште во шкотскиот град Данблејн, пред да се самоубие.

Во април 2002 година, младиот Роберт Штајнхаузер (19) отворил оган во Ерфурт, Германија, откако рекол дека нема да полага тест по математика, убивајќи 12 наставници, секретарка, двајца ученици и еден полицаец во гимназијата Гутенберг, пред да се самоубие.

Во масовно убиство во Финска во септември 2008 година, ученикот Пека-Ерик Аувинен уби шест пријатели, училишната медицинска сестра, директорот и себеси со пиштол во средното училиште „Јокела“ во близина на Хелсинки, а истата година, ученикот Мати Саари отвори оган во стручно училиште во Каухајоки во северозападна Финска, убивајќи уште девет ученици и еден член на персоналот пред да се самоубие.

Во март 2023 година, во Германија, вооружен маж уби шест лица во Хамбург пред да изврши самоубиство во сала за богослужба на Јеховините сведоци. Потоа беа ранети уште осум лица, вклучувајќи и седуммесечна бремена жена која ја загуби својата неродена ќерка.

На 3 мај 2023 година, во Србија, едно момче (13) уби уште девет ученици и еден чувар во основното училиште „Владислав Рибникар“ во Белград, а рани шест ученици и еден наставник.

Еден ден подоцна, во Србија, вооружен млад маж уби осум лица и рани уште 14 во села во близина на Младеновац.

Во декември 2023 година, чешки студент прво го убил својот татко, а потоа уште 14 лица на неговиот универзитет во Прага.

Вооружениот напаѓач, убиен на лице место веројатно од еден од сопствените куршуми, е осомничен и за убиствата на друг маж и неговата двомесечна ќерка, кои беа пронајдени убиени во шума во село надвор од Прага една недела претходно.

Во јули 2024 година, вооружен напаѓач убил шест лица, вклучувајќи ја и неговата мајка, и повредил уште петмина во дом за стари лица во Хрватска.

Во Шведска, во февруари 2025 година, вооружен напаѓач убил 11 лица, вклучувајќи се и себеси, во центар за образование на возрасни во централна Шведска во најсмртоносниот масовно пукање во земјата.