Обвинителството ја прошири истрагата за пожарот во дискотеката „Пулс“ во Кочани, па три месеци по трагедијата отвори истражната постапка и против сопственикот на агенцијата којашто го обезбедувала кабарето.

Од ОЈО објаснуваат дека против него се пронајдени докази дека е реален сопственик на агенцијата за обезбедување на имот и лица од Скопје.

Според обвинителството, осомничениот се товари за тешки дела против општата сигурност од член 292 во врска со член 288 од Кривичниот законик.

„Согласно доказите, тој раководел со деловниот потфат и целокупното работење на агенцијата, заедно со претходно осомничениот управител и со овластеното лице на подружницата во Кочани. Тие без да имаат склучено договор со корисникот на услугата Кабаре ПУЛС Кочани, во текот на 2025 година вршеле обезбедување на имот и лица за клубот“, соопшти ОЈО.

Од ОЈО велат дека новиот осомничен во континуитет активно раководел со планот и начинот за давање на услугата обезбедување преку правното лице.

„Заедно со осомничените кои биле ангажирани како обезбедување, спротивно на повеќе членови од Законот за приватно обезбедување, без каква било претходна безбедносна проценка и план за обезбедување, како и без проверка на условите за противпожарна заштита и опасност од пожари, без да извршат проверка по однос на сигурносните услови во кабарето од аспект на имот и лица, особено по опасност и можност за евакуација, во текот на вечерта кога настанал пожарот не контролирале и овозможиле влез на деца во објектот, не воделе грижа за преполнетоста на капацитетот за посетители во објектот, не спречиле внес и користење на експлозивни материи – пиротехнички средства од членовите на музичката група, со кои бил предизвикан пожарот, поради што настапила смрт кај 62 лица, со тешки телесни повреди се здобиле 157 лица, а со телесни повреди се здобиле 54 лица“, соопшти ОЈО.

Тој е приведен и за него ќе се бара притвор. Врз основа на судска наредба извршен е претрес на две локации во Скопје и во Пробиштип, како и во неговиот автомобил, при што била одземена обемна документација поврзана со агенцијата за обезбедување и електронски уреди.

Со досегашната истрага беа опфатени вкупно 46 осомничени за тешки дела против општата сигурност од член 292 во врска со член 288 од Кривичниот законик. Продолжува истрагата против 14 полициски службеници, за кои сè уште се прибираат докази.

Извршени се распити на околу 400 сведоци и оштетени, а испитани се и осомничените.

Истрагата ја водат 13 обвинители од основните јавни обвинителства во Кочани, Скопје, Штип и Куманово.