Иран треба да склучи договор со Соединетите Американски Држави за да ја заврши војната, нудејќи му ограничување на својата нуклеарна програма и повторно отворање на Ормускиот теснец во замена за олеснување на санкциите, изјави поранешен ирански министер за надворешни работи.

Мохамед Џавад Зариф, кој беше министер за надворешни работи од 2013 до 2021 година, во колумна за американското списание Форин Аферс рече дека Техеран има „предност“ во конфликтот против САД и Израел, но тврди дека Иран треба да ја запре војната за да спречи губење на повеќе цивилни животи и оштетување на инфраструктурата.

„Иран треба да ја искористи својата предност, не за да продолжи да се бори, туку за да прогласи победа и да склучи договор што ќе го заврши овој конфликт и ќе го спречи следниот“, рече Зариф во текстот објавен доцна во четврток.

„Треба да понуди ограничување на својата нуклеарна програма и повторно отворање на Ормускиот теснец во замена за укинување на сите санкции - договор што Вашингтон не би го прифатил претходно, но можеби ќе го прифати сега“, додаде тој.

Иран, исто така, треба да биде подготвен да прифати меѓусебен „пакт за ненапаѓање“ со Соединетите Американски Држави, како и економски односи, рече тој.

Војната мора да заврши во согласност со националните интереси на Иран

Техеран и Вашингтон ги прекинаа дипломатските врски кратко време по Исламската револуција во 1979 година.

Зариф, еден од архитектите на сега веќе изумрениот договор од 2015 година за иранската нуклеарна програма, се смета за релативно умерен во рамките на иранската елита, но нема официјална функција во сегашната влада.

Сепак, ова е можеби првпат за време на овој конфликт високопрофилна личност во Иран да повика на договор и крај на војната, при што високи воени и политички претставници секојдневно повикуваат на продолжување на борбите сè додека САД не бидат поразени.

Американскиот претседател Доналд Трамп се повика на тековните разговори со Техеран без да даде детали, но исто така се закани дека ќе ја врати земјата „во камено доба“ ако не успее да се договори за условите.

„Како Иранец, огорчен од неодговорната агресија и грубите навреди на Доналд Трамп, но горд на нашите вооружени сили и отпорен народ, неодлучен сум околу објавувањето на овој мировен план во Форин аферс, напиша Зариф на англиски јазик во петокот на Х.

„Сепак, убеден сум дека војната мора да заврши под услови што се во согласност со националните интереси на Иран“, додаде тој.

Зариф во текстот во Форин аферс предупреди дека „иако продолжувањето на борбата против САД и Израел може да биде психолошки задоволувачко, тоа ќе доведе само до понатамошно уништување на животите на цивилите и инфраструктурата“.

Извор: ТРТ Ворлд