Израелскиот министер за надворешни работи Гидеон Саар го обвини хрватскиот претседател Зоран Милановиќ за антисемитизам во објава на социјалната мрежа X.

Реагирајќи на завчерашните изјави на Милановиќ, во кои хрватскиот претседател ги критикуваше постапките на израелскиот амбасадор во Хрватска, велејќи дека во Хрватска „нема да имаме инфекции и бактерии од други луѓе, ниту израелски ниту ирански“, Саар напиша дека „навредливата реторика на хрватскиот претседател е неприфатлива, а неговиот јазик исполнет со омраза кон Израел и ционизмот одразува антисемитски пристап“.

„Хрватска е членка на Меѓународната алијанса за сеќавање на холокаустот и се обврза да се спротивстави на антисемитизмот. Претседателот ги предаде овие обврски“, напиша Саар на X.

Откако израелскиот амбасадор во Загреб, Гари Корен, пред неколку дена во интервју за ХИНА ѝ рече на Хрватска да го провери персоналот на иранската амбасада во Загреб, бидејќи таму може да има членови на Револуционерната гарда со задача да собираат разузнавачки информации и да поддржуваат тероризам, Милановиќ во средата изјави: „Овој функционер од Тел Авив или каде и да е, речиси кажа дека има терористичко дувло во иранската амбасада во центарот на Загреб“.

Амбасадорот затоа беше повикан во Пантовчак на разговор, каде што му беше кажано да не ѝ штети на Хрватска и да не ја вознемирува јавноста, рече Милановиќ, додавајќи дека „не сакаме инфекции и бактерии од други луѓе во Хрватска, ниту израелски ниту ирански“.

„Братче, ова е Загреб, а не Тел Авив. Нека господата според тоа се однесуваат соодветно“, нагласи хрватскиот претседател.

Милановиќ по изјават се осврна на активностите на ИРГЦ на Блискиот Исток.

„Тие навистина, кога станува збор за Блискиот Исток, како и Израел, се склони кон терористички методи. Што е убивањето во Газа освен тероризам и преживување на израелските војници? Но, кога станува збор за Европа, Иран не дејствува терористички во Европа, колку што јас знам“, рече Милановиќ.

Претседателот на Хрватска, пак, пред две недели изјави оти хрватската војска нема да соработува со израелската војска, која ја смета за одговорна за најтешките воени злосторства.

Оваа изјава следуваше по официјалната посета на потпретседателот на Владата на Хрватска и министер за одбрана, Иван Анушиќ, на Израел, која Милановиќ ја нарече „одење на покајание за гревови“.

Претседателот на Хрватска истакна дека не сака Израел да стане „господар на најинтимните информации“ за безбедноста на Хрватска преку технолошка и воена соработка, и ја нагласи моралната неприфатливост на начинот на кој Израел ја води војната против, како што рече, „многу послаби од себе“, што го оцени како кукавички чин.