Четботот Грок со вештачка интелигенција изграден од xAИ, компанијата на милијардерот Илон Маск, ја ограничи функцијата за генерирање и уредување слики исклучиво на претплатници кои плаќаат за услугите на социјалната мрежа X, по глобалните критики за можноста за создавање дипфејк порнографска содржина, вклучувајќи слики од жени и малолетници, пишува „Еурактив“.

При обид за генерирање на слики преку платформата X, Грок сега ги информира корисниците дека оваа функција е достапна само за претплатници кои плаќаат и ги поканува да се регистрираат за „премиум“ верзијата на X.

Сепак, не е прецизирано дали постојат дополнителни ограничувања за претплатниците кога станува збор за генерирање сексуално експлицитна дипфејк содржина.

Грок во последните денови беше критикуван од регулаторите поради неговиот таканаречен „зачинет“ начин на работа, кој овозможуваше создавање дипфејк сексуализирани слики, вклучувајќи слики од малолетници.

Затоа европските пратеници и некои земји-членки повикаа на построги мерки против ваквите технологии.

„Ова е нелегално“, изјави портпаролот на Европската комисија за дигитални прашања, Томас Рејниер.

Во четврток, Европската комисија му наложи на X да ги зачува сите интерни документи и податоци поврзани со Грок до крајот на 2026 година, користејќи ги овластувањата според Законот за дигитални услуги (ДСA), кој го става X меѓу платформите што се предмет на најстрог надзор од ЕУ.

Сепак, комисијата сè уште не започнала нова формална истрага за X во врска со случајот со дипфејк порнографијата.

Тестовите спроведени од Eуроактив покажаа дека Грок, кога се пристапува како самостојна апликација, а не преку платформата X, сè уште може бесплатно да генерира слики врз основа на барањата на корисниците.

X не одговори на барањата за коментар до времето на објавувањето на текстот.