Регулаторната комисија за енергетика (РКЕ) денеска донесе одлука за утврдување на највисоки малопродажни цени на нафтените деривати и горива за транспорт.

Од полноќ, бензините ЕУРОСУПЕР БС-95 и БС-98 ќе поевтинат за 7 денари по литар, додека цената на ЕУРОДИЗЕЛ ќе се намали за 5,50 денари. Поевтинуваат и екстра лесното масло за домаќинство и мазутот.

Просечното намалување на малопродажните цени изнесува 7,51%, а новите цени ќе започнат да се применуваат на 10 ноември од 00:01 часот.

Од полноќ, малопродажната цена на ЕУРОСУПЕР БС-95 ќе изнесува 86 денари за литар, додека малопродажната цена на ЕУРОСУПЕР БС-98 ќе изнесува 88 денари за литар. Малопродажната цена на ЕУРОДИЗЕЛ БС (Д-Е V) ќе изнесува 94,5 денари за литар.

Малопродажната цена на екстра лесното масло за домаќинство (ЕЛ-1), се намалува за 6,50 денари за литар и ќе изнесува 103,5 денари за литар.

Малопродажната цена на мазутот М-1 НС, се намалува за 6,261 денариза килограм и ќе изнесува 49,312 денари за килограм.

Согласно Одлуката за изменување на одлуката за определување на видот на енергентите, временскиот период, како и начинот на пресметка на акцизата, , применет е намален износ на акцизата од 2 денари за литар кај бензините и намален износ на акцизата од 4 денари за литар кај дизелот.

Исто така во оваа одлука е применет намален износот на ДДВ за нафтениот дериват ЕУРОДИЗЕЛ (Д-Е V), во износ од 10%, согласно Одлуката за изменување на одлуката за определување на видот на добрата и временскиот период на примена на повластена даночна стапка (“Службен весник на Република Северна Македонија” бр. 256/26).

„Референтните цени на нафтените деривати на светскиот пазар во споредба со претходната пресметка бележат намалување кај бензините во просек за 12,34% или за 136,65 долари за тон, кај дизелот намалувањето е во просек за 6,78% или за 98,3 долари за тон“, велат од РКЕ.

Оттаму додаваат дека курсот на денарот во однос на доларот во изминатиот период, во просек изнесува 54,84 денари за долар и е за околу 0,52 проценти понизок од курсот на доларот (55,13 денари за долар) по кој беа формирани цените со претходната пресметка.