Претседателката на српскиот Парламент, Ана Брнабиќ, ја свика деветтата вонредна седница за понеделник во 10 часот за да се разгледа Предлогот за гласање недоверба на Владата.

Седницата е свикана на барање на 109 пратеници, објави парламентот.

Дневниот ред за оваа седница има само една точка - Предлогот за гласање недоверба на Владата, кој го поднесоа 62 пратеници од опозицијата на 13 февруари.

Брнабиќ претходно денес изјави дека седницата ќе биде закажана за понеделник и нагласи дека тоа ќе покаже дали мнозинството во парламентот има доверба во владата на Ѓуро Мацут.

„Имаме 30 дена (од гласањето за недоверба на владата) за да формираме нова влада, ако не се формира нова влада, тогаш парламентот се распушта“, изјави Брнабиќ за К1, додавајќи дека од тогаш па натаму има 60 дена до изборите.

Како што изјави таа, може да се случи парламентот сè уште да има доверба во владата на премиерот Мацут.

„Да видиме само дали парламентот има доверба во владата или не“, додаде таа.

Предлогот за гласање недоверба на владата беше поднесен на 13 февруари од пратениците на Народно движење на Србија - Ново лице на Србија, Партијата за слобода и правда, Центарот на Србија, Ние, моќта на народот - проф. д-р Бранимир Несторовиќ, Еколошкото востание, Зелено-левичарскиот фронт, Движењето на слободни граѓани, ПОКС и независниот пратеник Милољуб Албијаниќ.

Причината за барање гласање недоверба на владата, како што наведоа во нивното образложение, е постоењето на основано сомнение за, како што тврдат, вмешаност на одредени членови на владата во случајот со Генералштабот, како и фактот дека премиерот не презел никакви мерки во оваа пригода.

Предлогот за гласање недоверба на владата првпат им беше презентиран на пратениците на 15 април.

Сепак, таа седница не се одржа поради недостаток на кворум во два наврати, а немаше кворум ниту во третиот обид следниот ден.

Претседателката на српскиот Парламент, Ана Брнабиќ, тогаш изјави дека од 62-та пратеници кои го потпишаа предлогот за гласање недоверба на српската Влада, на седницата биле присутни 44, додавајќи дека ова покажува колку се сериозни претставниците на опозицијата во своите намери.