Рускиот претседател Владимир Путин му честита на севернокорејскиот лидер Ким Џонг Ун за неговиот реизбор за претседател на Северна Кореја (ДНРК), соопшти Кремљ.

„Драг другар Ким Џонг Ун, ве молам, прифатете ги моите срдечни честитки за Вашиот реизбор за претседател на државните работи на Демократска Народна Република Кореја“, се вели во соопштението.

Путин истакна дека одлуката на пратениците на Врховното народно собрание јасно ја покажува едногласната јавна поддршка за курсот на Ким.

„Во Русија ние многу го цениме Вашиот личен придонес во зајакнувањето на пријателските, сојузнички врски меѓу нашите земји. И, секако, ќе продолжиме со нашата тесна заедничка работа за натамошен развој на сеопфатното стратегиско партнерство меѓу Москва и Пјонгјанг“, додаде тој.

Ким беше повторно избран за претседател на Комисијата за државни работи, највисоко управно тело на земјата, за време на првата седница на 15. Врховно народно собрание што се одржа во Пјонгјанг.